Press "Enter" to skip to content

Paletwa Peng Ah Thilman A Fakning Khuaruahhar Bak Si

Paletwa Peng ah thilman a fak, Facang tun khat ah Ks. 100,000 leng le datsi laang khat ah Ks.9000 a phan. Chin Ramkulh Paletwa khua ah 2021 February 1 in Kawl ralkap nih uknak an laak hnu in thilman an fak chin lengmang i Facang tun khat ah Ks. 100,000 leng le datsi laang khat ah Ks. 9000 a si, tiah Paletwa khuasami sin in kan theih.

Paletwa peng ah AA, Kawl Ralkap le CNA tiin hriamtlai phu thum an um i chawlehthalnak lam hna an pit dih. Hi kong ah khuami pakhat nih, “Paletwa peng chung ah Kawl ralkap, AA le CNA tiin hriamtlai phu thum an um i hi hriamtlai phu hna tih ruang ah chawlehthalnak tuah hi an ngamh hna lo.

Uknak an laak hnu lebang ahcun thilman an fak chinchin. Datsi laang khat ah Ks. 9000 kan pek. Facang tun khat khi sing khat naktam in kan cawk. Cu hmanh cu cawk ding hi caanhmaan in an um lo,” tiah Paletwa khuasa pakhat nih The HakhaTimes ah a chim.

“Atu hrawng belte hi Rakhine Ramkulh, Kyaukdaw lei in tilawng a ra i a vun phurh mi eidin ding in khuami kan i chang ko. Thilman a fah tuk ko zong ah cawk ding dang a um lo ahcun a um mi kha cawk in ei a si ko,” tiah a chimchap.

“Ralzaam a tam-u hi cuhlan ralkap nih uknak a laak hlan i AA le Kawl ralkap karlak kahdohnak ruang ah ralzaam dirhmun a phanmi an si. Hi chung in cheukhat cu an umnak hmun an panh than cang nain a umnak hmun ah a kir rih lo mi hi 5000 renglo cu an si rih lai,” tiah, Paletwa ah khuasami pakhat nih The Hakha Times ah a chim ve.

Paletwa Peng hi cuhlan ahcun AA le Kawl ralkap kar kahdohnak a fak bik mi Peng a rak si nain, Kawl ralkap nih 2021 February 1 ah uknak an laak hnu Chin Ramkulh ah kahdohnak a tlawm bik khua a si tiah kan theih. Credit; The Hakha Times

Be First to Comment

Leave a Reply

Your email address will not be published.