Palik Poh Poh PDF Kong Le NUG kong Thawng An Kan Pek/Thanh Khawh Lo Mi Cu Ral Hmai Ah Kalter Hna Nan Si Lai
Mon ramkulh ah National Unity Government of Myanmar(NUG) he a pehtlai mi People Defence Force(PDF) le anmah NUG hna an cawlcanghnak thawngpang a kan pe kho lotu palik pawl cu ralkahnak hmaikal ah kuat nan si lai, tiah ralhrang phu nih an hro hna, tiah palik le ralhrang he aa pehtlai mi hna sin in theih a si.
NUG cozah he a pehtlai mi hna, a bawmchantu hna le mizapi vengtu ralkap hna an cawlcanghnak le an tlaih mi hna he pehtlai in hmunkip palik sakhan hna nih zarhkhat ah a tlawmbik NUG le PDF an cawlhcangh ning pakhat tal, thawng nan kan pek lai, tiah pengkip hmunkip ralhrang phu hruaitu hna nih nawlpeknak an chuah.
Cu an cawlcanghnak a chuahpi kho lo mi palik sakhan tuanvo ngeitu hna cu khuate lei ah kalter an si lai i ralkahnak hmun ah a hmasa bik ah an kal lai, tiah an hro hna ti in palik ralhrang hna he a pehtlai mi hna nih cun an chim. Nawlngeihnak laak hnu ah ralhrang phu hna nih palik pawl cu an namneh ngai hna i ralhrang phu nih sualnak/palhnak pakhatkhat an tuah zong ah palik pawl a puh tawn hna, tiah an chim.
Cu pinah an umnak hmun palik sakhan hna ah bomb a puah tibantuk le mirawitu an thah hna tibantuk a um ahcun ralhrang phu nih palik phu cu an puh tawn hna. Ralhrang nih nawlngeihnak an laak hnu ah palik cheukhat cu kahdohnak a fahnak hmun Chin ram, Sagaing ramṭhen, Kayah ramṭhen tibantuk ah an kalter hna, tiah theih a si. Than Lwin Times
