PDF he pehtlaihnak nan ngei tiah ralhrang nih chinmi Sui Min Thang le a hoi le 2 an thah hna
Tamu Peng Ah SAC Ralkap Nih Chin Mino Pathum An Thah Hna, Sagaing ramṭhen, Tamu peng chaklei Kyunpinthar khua in Tamu lei ah a kalmi mino pathum cu January 23 ah SAC ralkap nih an thah hna, tiah theih a si.
Kyunpinthar khuami Let Min Thang(kum 25), Chaungnatgyi khuami Sui Min Thang(kum 23) le Ngam Min Hawng(kum 17) hna cu, Kuntaung SAC ralkap sakhan hmai ah checkhlatnak an tuah hna i, PDF he pehtlaihnak nan ngei an ti hna caah an thah hna, tiah theih a si.
Min langhter a duh lomi pakhat nih, “Zanlei sml 2:00 hrawngah SAC ralkap nih an tlaih hna. Cu hnu tlawmpal ah an tuk an velh hna i an ṭah aihram thawng zong a thang ngaingai,” tiah a chim.
SAC ralkap nih cun kan that hna lo tiin an al ko hna nain an ruak zong an chungkhar hna sinah an pe duh hna lo, tiah an chungkhar he naihniam in a ummi pakhat nih a chim.
Mino pathum hna cu PDF he pehtlaihnak a ngeimi zong an si lo, Caw le Na a khaltu an si. Atu bantukin SAC ralkap nih an thahmi hna hi cu kan lung a fak tuk hringhran ko, tiah a chim chap.
Kuntaung khua cu Tamu Aungzeyar motor lam cungah a ummi a si i Tamu in meng 8 hrawng aa hlat. Kuntaung SAC ralkap sakhan hmai a phanmi khualtlawng mi hna cu an cycle an namter hna, tiah theih a si.
Hi Mino an thah mi hna hi Kuki-Chin miphun Tamu Township ah a um mi hna chungin a si. The Chin Post
NUG Nih Leopard Column Ralkap Pawl Meithal A Pek Hna, Southern Region No. 3 ah a ummi Leopard Column ralkap hna kan training a donghnak ni ah NUG runvennak zung nih meithal a kan pek, tiah Southern Region nih cathanh an chuah.
Leopard Column ralkap hna cu cerhmun ah an i ceer i salam pek in biakamnak an ngeih hna hnuah NUG Prime Minister le runvennak minister nih ca an kuatmi hna relnak an ngei, tiah theih a si.
Leopard Column an training ah meithal a phongh le a bunh, raltuk tikah cawlcangh ning, bawi pakhat khat va khamh ning le ral tuk tikah hliamhma pumi hna rianrang in fimtawl ning kong an cawnmi zong an cathanh ahcun an langhter.
Southern Region No.3 in ralbawi chang Saw Shia nih biatawi a chim i NUG nih meithal a pekmi hna kong le Prime Minister nih laksawng kyats sing 10 a pekmi hna kong zong an lunglawmhnak a chim, tiah theih a si.
January thla ṭhiamṭhiam ah Cobra Column le Dawna Column trianing an dih ni ah NUG nih meithal an rak pek ve cang hna. The Chin Post
