Press "Enter" to skip to content

PDF Le KIA Fonh Nih Min Aung Hlaing Ralkap Sakhan An Lak

Kachin ramkulh, Hpakant peng Lungkhin khuakomh nichuahlei ralhrang phu hmunhma, Jayayan(ဂျာရာယန်) sakhan cu nihin February 3, zinglei suimilam 3:00 hrawng ah KIA brigade 9 kuttang um battalion 6 in KIA phu hna le PDF nih luhhnawh in an doh hna hnu ah cu sakhan cu an lak khawh, tiah KIA thawngzamhnak in theih a si.

Ralhrang sakhan laak kahdohnak ah ralhrang a thi mi an tam kho, kahdohnak kong ah a thi mi le hliamtuar fianghlang in theih a si rih lo. Nihin zinglei suimilam 5:00 luan deuh hrawng ah Hpakant ralhrang nih an umnak tlang in an duhnak hmun poh hriamngan in voi 10 leng an kah, tiah theih a si.

Kachin ramkulh, Mohnyin peng Mawhan khua um palik sakhan zong nihin February 3, zinglei suimilam 3:30 hrawng ah KIA battalion 35 le PDF phufonh nih doh in an sakhan cu an laak khawh tiah theih a si. Cu sakhan cu mei in an khangh hnu ah checkhlatnak an tuah i ralhrang phu lei riansang tlaitu minung 2 an thi. Hriamthil tam ngai a tlaih lengah ralhrang cheukhat an nun bu in tlai a si, tiah PDF thawngzamhnak nih a langhter.

“Zinglei tuante ah Mawhan palik sakhan le menghratung kar ah hriamngan le hriamhme kahthawng cu theih a si hnu ah Mawhan palik sakhan cu mizapi vengtu ralkap phufonh nih an lak khawh kha kan theih, atu ah vanlawng thawng kan theih ṭhan,” tiah Mawhan khua pawng um mi pakhat nih Khit Thit Media ah a chim.

Credit: The Chin Post

Ralhrang nih nawlngeihnak an lak hnuin mizapi cungah an tuahmi, thahnawnnak, tlaihkhihnak, hremnak le ṭhatlonak dang tampi hna cu an cohlan khawh ti lo caah ralhrang siizung i siibawi tampi cu an zam cang tiah theih a si. Cu a zammi hna chungah Taungoo ralhrang siizung in siibawi ngan 9 zong an i tel ve.

October, 2021 in January, 2022 tiangah Taungoo ralhrang siizung in a zammi siibawi hna cu Boci Lat Ko Ko, Boci Kyaw Kyaw Aung, Boci Kyaw Lin Paing, Boci Ngi Yee Htet, Boci Zaw Myo Htet le Boci Wuna hna an si. Siibawi pakhat nih “Taungoo ralhrang siizung in thla 4 chungah siibawi 9 an zam. An pakua ningin boci rank an si dih.

Cawnnak zongah a sang ngaimi an si. Ralhrang siizung dang zongin a zammi an tampi. Raldohnak hmun i sii lei rianṭuantu hna zong an zam len. A ruang cu ralhrang kongton uknak an duh lo, siibawi thiamnak cu mizapi thahnak ah hman ding a si lo” tiah a chim. Source: Khit Thit Media

Be First to Comment

Leave a Reply

Your email address will not be published.