PDF Le Ralhrang Kahdohnak Ah Khua Mi 6 An Thi, Minung 13 Zong Nih Hliam An Tuar
Sagaing ramṭhen, Yinmapin peng Kaanta-Latpaantaw khua pawng ah March 8, Zing Sml 9 luan in zaanlei Sml 4 leng tiang SAC ralkap le Yinmapin PDF karlak kahdohnak faak ngai in a chuak, tiah theih a si.
Cu kahdohnak ah cun SAC ralkap lei nih ngol loin hriamngan an kah ruangah ralzaam minung 13 hliamhma an tuar i, cu lakah minung 6 cu an nunnak a liam, tiah theih a si. Cu leng ah SAC ralkap nih Latpantaung khua cozah sianginn lei mipi inn cheukhat zong an khangh chap, tiah theih a si.
Tualchung hramtlai phu he faak ngai in aa doh mi hna SAC ralkap pawl hi February 28 Yinmapin peng, Tapyi Aye khua a khanghtu kha an si i, atu hi minung thazaang 300 nak tlawm lo an um, tiah theih a si.
Sagaing ramṭhen, Shwebo peng Ciohmyoung(ကျောက်မြောင်း) in thlanglei Makok(မခေါက်) khua, Heingtagyi(ဟသ်ာကြီး) khua lei ah rallam a sial mi SAC ralkap pawl cu nihin March 8 chunhnu Sml 2 hrawng ah tualchung mipi vengtu ralkap phu nih bomb an puah hnawh hna i SAC ralkap 4 an thi i hliam tuar mi zong an um, tiah theih a si.
SAC ralkap cu Nattaung Naga mipi vengtu phu le Ghost Rider STF Mandalay alliance phu 2 nih bomb lung 6 puah hnawh in an doh hna, tiah Nattaung Naka phu nih thawng an thanh. Credit: The Chin Post
CNA/CNF hmunhma chung ah a luancia February 27 in March 7 tiang Chin mizapi vengtu ralkap le SAC ralkap kar ah voi 18 tiang kahdohnak a chuak i, cu kahdohnak chung ah cun SAC ralkap lei in minung 80 leng an thi. Chin mizapi vengtu ralkap phu lei in minung 4 nih ram le miphun caah an nunnak an pek.
Chin ramkulh Falam in Hakha lei ah riahcaw phor in a kal mi SAC ralkap motor 27, tank 2 le minung thazaang 200 hrawng cu lampi ah voi 15 kah an si, hi chung ah hin SAC ralkap 70 hrawng an thi. Mizapi vengtu ralkap CNA in minung 3 le CNDF in minung pakhat tiin an dihlak minung 4 an nunnak a liam. Cu kahdohnak ah cun Chin ralkap CNA, CNDF le CDF-Hakha phufonh hna nih an kahdoh hna.
Cun, Chin ramkulh Falam peng no.2 India-Myanmar lampi ah cawlcanghnak a tuahtu SAC ralkap phu hna le CNA, mizapi vengtu ralkap phufonh kar kahdohnak a chuak i, cu kahdohnak ah cun SAC ralkap in minung 8 hrawng an thi. Mizapi vengtu ralkap phufonh lei hliamhma tuar an um lo.
Cu kahdohnak ah cun Chin National Army(CNA), Chin National Defense Force (CNDF), People Defence Force- Zoland(PDF-Zoland), Civic Defense Militia (CDM-Siyin), CDF-Hualngoram phufonh hna an i tel, tiah Chin National Front nih cathanh an chuah. Credit: The Chin Post
