Press "Enter" to skip to content

PDF Minung 5 Nih Ram Le Miphun Caah An Nun An Pek

Sagaing ramṭhen, Buhtalin(ဘုတလင်)peng ah SAC ralkap nih nitin ngawt in rallam an sialnak ni 10 tluk a si cang i, PDF nih an rak kah ve lengmang hna caah PDF in minung 5 an nunnak a liam cang.

May thlachung Buhtalin (ဘုတလင်) peng ah SAC ralkap cu hmunhnih in rallam an sial i, khua pathum ah mizapi inn hna cu meikhangh in an hrawhpiak hna. Tualchung hriamtlai phu hna he atu le tu ti tluk in an i kap. Buhtalin (ဘုတလင်) peng tualchung hriamtlai phu in ralkap 5 an nunnak a liam i, SAC ralkap lei 10 hrawng an thi ve, tiah khua mi nih an chim.

May thla thok in nihin May 11 tiang SAC ralkap pawl cu thazaang 100 lengmang he Buhtalin (ဘုတလင်) pengchung ah rallam an sial tawn. Gantit (ကံသစ်) khuachung mei an khangh ruang ah kum 78 tluk tar pakhat cu meikanghnak in a nunnak a liam. Cun, Oakphu(အုတ်ဖို) khuapawng Yawgi(ယောဂီ) sianginn ah a zaam mi minung 9 cu a ruang um lo in SAC ralkap nih an rak thah hna, tiah theih a si. Credit; The Chin Post

Pako ramṭhen, Minhlah le Oakphu (အုတ်ဖို) pengchung ah SAC ralkap kuttang um palik 1, pyusawthi 6 le inn zakhat uktu 1 ti in, an dihlak minung 8 cu kahthah an si, tiah Pako ramṭhen tualchung hriamtlai phu nih an thanh. Pako ramṭhen Tayawady pengkomh Minhlah peng Sanboat(စမ်းဘုတ်) khua ah tit-taw(သစ်တော) thing a firtu hna sin ah phaisa a haltu gate hngaktu palik 1 le pyusawthi 5 cu nizan May 10 ah, Tayawady pengkomh battalion no. 3801, tat-khuai 1 le battalion no. 3802, tat-khuai 3 nih an kah hna caah an thi, tiah theih a si.

Cun, Tayawady pengkomh Oakphu (အုတ်ဖို) peng Wai khuakomh ah SAC ralkap rian a cohlangtu khuabawi si mi pyusawthi hruaitu Khin Maung Tan le Tawatai(တာဝါတိုင်) khua inn zakhat uktu Aung Myo Zaw cu Pako ramṭhen tualchung hriamtlai phu battalion no.3803, tat-khuai 4 nih nihin May 11, zaanlei suimilam 6:00 ah an kah hna i, kah ah tonnak hmun ah an thi colh, tiah theih a si.

Thil Zuartu Hna Sin In Cycle le Phaisa A Chuttu SAC Ralkap PDF Nih An Tlaih: Magwe ramṭhen Pakokko ah thil zuartu hna sin in cycle, phone le phaisa a chuttu SAC ralkap pakhat cu PDF nih an tlaih, tiah Young Force UG nih nihin May 11 ah an thanh. Nizaan May 10, zaanlei ah tualchung hriamtlai phu hna nih khuachung chekhlatnak an tuah lio ah thil zuartu cheukhat nih cycle, phone le phaisa chuh an tonnak kong cu an chimh hna.

Cu hnu ah Young Force UG le Pakokko pah-kah-phah nih hlathlainak an tuah i, thilri a chuttawntu SAC ralkap pakhat cu an thilri a chuhmi hna he tlaih a si, tiah theih a si. Tlaih a tong mi SAC ralkap pa cu zaam a timh caah fimhlawm a si, thilzuar mi hna sin in a chuh mi thilri cu a ngeitu hna sinah pek ṭhan an si, tiah theih a si.

Relchap>>>>><<<<<< Kaya(Karenni) ramkulh Demoesoe pengkomh Hprosu peng Mayse(မယ်စဲ့) ah caan karlak fimcawnnak ca ah a hlei in zaanghlei cawitu siangcachim (saya/sayama) 900 leng cu training kan pek khawh hna, tiah Kaya ramkulh fimcawnnak saya/sayamah phu nih May 11 ah cathanh an chuah.

NUG Education Department nih, a chuahmi Video file tete zong saya/sayamah lawng si loin siangngakchia ca zong ah ṭha hnem santlai a si khawh nakding ah, Memory Sticks in an chiah hna. Training petu saya/sayamah pawl cu lawmman tlawmpal cio an pek hna, tiah theih a si.

A ra laimi caan karlak fimcawnnak ca ah timhcia tein kan um khawh nakding le hlawh a tlin nakding ah, Kaya ramkulh fimcawnnak saya/sayamah phu, CDM saya/sayamah, Volunteers mino le khuanu khuapa an dihlak fonh in an i zuam cuahmah, tiah theih a si. The Chin Post

Be First to Comment

Leave a Reply

Your email address will not be published.