Press "Enter" to skip to content

PDF Pasaltha Hna Nih Min Aung Hlaing Ralkap An Kah Hna Caah Minung (28) Bak Thi Le Hliam An Um

Sagaing ramṭhen Salingyi peng Kyatat palik sakhan cu tualchung hriamtlaiphu phu 5 nih aluancia October ni 2 ah an va kah hna tiah theih a si.

Salingyi peng Kyatat palik sakhan cu a luancia October ni 2 ah tualchung hriamtlaiphu fonh hna nih rallam hmunhnih in an i ṭhen i an kahdoh hna, rallam hmunkhat a kal mi hna nih palik 5 an kahthah hna i G2 meithal pakhat an lak,

cun rallam pahnihnak nih sakhan chungah an luh hnawh hna i an kah hna caah an i runvennak hmun (Bunker) pathum a rawh pinah hriamngan chaihnak pakhat a rawk. Cun tutan kahdohnak ah hin a tlawmbik palik 10 an thi i 18 nih hliam an tuar tiah theih a si.

Kyatat palik sakhan kahdohnak ah hin suimilam 5 hrawng a rau i sakhan laknak ding ah bunker pahnih a tang, cu lio ah Monywa in Mi35 vanglawng pahnih in an kah hna caah hnu an kir tiah theih a si. Credit; The Chin Post

Thawngdang Relchap: CNF nih kum 30 chung meithal in dothlennak an kalpinak ahhin mah tluk canrem le cantha hi a um theng ti lai lo tihi ka ruat tawn. CNF an thazang a thawn ahcun Kawl ralkap kut in Chinram lak ding ahhin cantha bik a si. A hlan ah khan cun ralkap thazang in Chinram rak lak ding ah a rak fawi lo bakmi a si.

A tu ahcun Min Aung Hlaing nih uknak a laknak ruang ah pemgkip le tlangkip ah hriamtlai phu an karh. Mahhi lak a biapi bik cu Sagaing le Magwe ramri PDF pawl hi an si hna.

A tu ah kan zoh ahcun Kalay peng, Gankaw peng PDF le CDF an um dih cang. Magwe ramthen Yaw peng ah PDF an um dih cang fawn. Fawi tein Chinram ahhin ralhrang nih an thazang an chap kho ti lo. An thazang an chap khawhnak bik lam cu Helicopter lawng a si cang. Helicopter mihcun mimung tampi a phur kho fawn hna lo.

A tu tluk can tha hing tam ai chap kho ding mi a si ti lo. Kawl lei ralhrang an rat hmanh ahhin nazi pathum chung kal kha zarh hnih hna an rau. Cu tluk cun mipi lei nihhin ralhrang hi kan tei cang hna.

Kachin ram KIA le Shan ramkulh bantuk in Chinram hi ruah ding a si lo. Kachin ram zong khi tluk in KIA an thawng ko nain an lak khawh tung lo kan ti men lai. Cun, Shan ramkulh zong khi tluk in hriamtlai an thawng ko nain an lak khawh tung lo kan ti men lai. A si loh.

Kachin ram hna khi cu ralkap nih an thazang an chap khawhnak ding lam a tam tuk. Tilawng zong in kalnak lam tampi an ngei. Vanlong zong in kalnak lam tampi an ngei. Motor zong in kalnak lam tampi an ngei. Yangon in Myitkyina maw Putao maw hmun tampi ralkap tlawmpal te ah an phan kho colh lengmang.

Kannih Chinram cu a si lo. Kawl lei in ralkap nih thazang chapnak ding ah Tilawng lam a um loh. Tlanglong lam zong a um lo. Motor lam pahnih lawng bak a um. Mahhi Motor lam pahnih phih khawh ahcun ralhrang caah lam a um ti lo. Kalay le Magwe lei lawng in lam an ngei.

Cu ruang ah CNA le CDF an hriamnam a that ahcun Chin ramkulh hi fawi tein lak khawh ding mi ramkulh a si. Kawlram ah a lak a fawi bik ding mi ramkulh a si. Hihi mipi nih kan fian a hau. Credit: Cung Bawi Lian

Be First to Comment

Leave a Reply

Your email address will not be published. Required fields are marked *