Poah Peng Ah Meikhangh In Thah A Tong Mi Ruak Pa 3 An Hmuh,Ralhrang Tuah Sernak A Si Lai Zumh Asi

Magway ramṭhen, Poah peng ah January 23 zinglei ah meikhangh in thah a tong mi miruak 3 kan hmuh, tiah Anonmous Special Task Force(ASTF) phu nih an chim. Poah peng thlanglei Kyauttaikhin khua ah nizan January 23 zinglei ah ralhrang phu hna nih meikhangh in an thah mi hna minung 3 ruak cu kan hmuh hna, tiah Special Task Force(ASTF) in chim phuannak nawlngeitu nih DVB ah a chim. “Ralhrang kut in thah a tong mi hna hi People Defence Force an si le mi sawhsawh an si fiang tein theih a si rih lo, checkhlatnak an tuah cuahmah lio a si.

“Ralhrang phu hna nih khuachung mi hna cu an phone an chuh dih hna caah pehtlaih an har ngai, thawngfiang kan theih in thawng thanh khawh kan i zuam lai,” tiah a chim. Kyauttaikhin (ကျောက်တိုင်ခင်) khua mi pakhat nih cun, “January 22 ah ralhrang phu hna cu minung thazaang 150 hrawng he phuthum in an rak lut. Khuachung mipi tampi an tlaih hna, an phone zong an chuh dih hna leng ah mipi sinin phaisa zong an chuh hna, tlaihkhih a tong mi hna cu thlah ṭhan an si nain an phone cu pek ṭhan a si ti lo caah pehtlaih a har ngai ko,” tiah a chim.

January 22 in 23 zinglei tiang ralhrang phu hna nih Poah peng Titngyinawng(သစ်ညီနောင်) khuachung cu luhhnawh in minung umnak inn 39 le phaisa in ting 600 leng man ngei thil an hrawh leng ah sui le thilri manfaak hna cu an i kalpi. Mino pahnih zong an tlaih hna i, an hrem hna tiah theih a si. DVB he chin post.

thawng dang……..Kayin ramkulh, Gawgayait (ကော့ကရိတ်) peng ah nawlngeihnak latu ralhrang phu lei nih helocopter le hriamngan an hman caah January 7-23 tiang ah khuachung minung 12 nih hliamhma an tuar i minung pakhat a nunnak a liam cang, tiah KNU brigade 6 hmunhma Doepalaya (ဒူးပလာယာ) pengkomh nih cathanh an chuah. Ralhrang phu kahnak ruangah a nunnak a liam mi hi Phoe Pyi kum-17 a si. Cun, Gawgayait (ကော့ကရိတ်) chaklei Yuahawng(ရွာဟောင်း) in khua mi minung 8 le Kaminekung(ကမိုင်ကုန်း) khua minung pakhat telh in hliamtuar mi dihlak minung 12 an si, tiah KNU brigade 6 nih an chim.

KNU lei nih zanlei suimilam 6:00 hnu cun mizapi lengchuahnak nawl an kham. Gawgayait (ကော့ကရိတ်) khua luhnak motor lampi ah fuel(လောင်စာဆီ) a phortu motor 2 cu January 7 zan suimilam 8:00 ah kah an tong. Cu fuel(လောင်စာဆီ) a phortu motor pakhat cu a kaang i a rawh hnu ah faak ngai in kahdohnak a chuak chap, tiah theih a si. KNU brigade 6 hmunhma Gawgayait (ကော့ကရိတ်) pengchung ah KNLA le ralhrang phukar kahdohnak ah ralhrang phu lei nih hriamngan an hman leng ah helicopter hmangin atu le tu vanlei in an kah hna, tiah theih a si.

Kaphnih kar kahdohnak ruangah Gawgayait (ကော့ကရိတ်) peng chung um Gawthnuai(ကော့နွဲ), Kaminekung (ကမိုင်ကုန်း), Yuatitkung(ရွာသစ်ကုန်း), Myohawng khua telh in khua 27 in khua mi minung 20,000 leng hrawng cu an umnak hmun kaltak in ralzaam dirhmun an phan cang. Ralzaam hna hi emergency in bawmhchanh an herh, tiah theih a si. A luancia caan tlawmpal ah a rak cangmi Myawady chaklei Laykaegaw (လေးကေ့ကော်) lei kahdohnak ruangah Laykaegaw (လေးကေ့ကော်), Metrawtalay(မဲ့ထော်သလေး), Pehihkalaw(ပဲဟိကလော်), Thimaewakhi (ထီးမယ်ဝါးခီး), Phaloegyi (ဖလူးကြီး), Phaloelay( ဖလူးလေး), Yatehkue (ရသေ့ဂူ), Minlatpan(မင်းလက်ပံ), Myatta Linmyaing (မေတ္တာလင်းမြိုင်) le Ingyinmyaing (အင်ကြင်းမြိုင်) ah a ummi khuachung mipi minung 16,000 hrawng cu Thailand ram lei ah ralzaam dirhmun in an um, tiah theih a si. Mizzima