Pu Ngun San Aung Nih Min Aung Hlaing Sinah A Thinphannak A Van Phuan Tak Cang

SAC Ralhrang nih rian an khinh mi Chin State SAC Pu Ngun San Aung nihcun Min Aung Hlaing sin ah, “Sniper in kan in kah lai tiah an ka hro peng,” tiah a chim. February 13 i tuahmi SAC meeting ah Pu Ngun San Aung nih hrocer le ṭhihphaih a tonnak kong cu Min Aung Hlaing sin ah a chim, tiah theih a si.

“Tu kar hrawng hi hrocer ka tong tuk, Ka chungkhat sahlawh rualchan tiang in hrocer an tong, Sniper in kan in kah lai, tiah an ka hro, CM ṭuan ti loin Mizoram ah kal ko mawṭaw hlanpiak na si, tiah an ka hrocer pin ah voikhat le bang cu rawl ka einak khaan chung ah Sniper in meiceu sen in

an ka tinhmi ka hmuh i thlalang awng ka van on i a tlau ṭhan,” tiah Pu Ngun San Aung nihcun Min Aung Hlaing a chimh. Cu SAC meeting ahcun Rih zong hi thinphang a si i Rih chekgate ah kan ralkap umloin CDF lawngte an um caah ralkap kan chiahpiak tiah Min Aung Hlaing cu a nawl chap, tiah theih a si. Credit; The Chin Post

Laos ram Golden Triangle hmunhma i a ummi Casino le chawhleh thalnak ah rianṭuanmi Myanmar ram minung 3000 leng cu Laos ram palek le Tuluk miphun company ngeitu pawl pawl nih an serhsat/namneh tuk hna ruangah an khua lei tlun zong an sianh hna lo i rianṭuan khawhnak work permit zong an pe hna lo i harsa ngai in an um, tiah Golden Triangle ah a um mi hna sin in theih a si.

Golden Triangle ah rian a rak ṭuan bal mi Myanmar miphun hna nih Tuluk miphun company ngeitu pawl sin ah duhlonak an langhter caah kumkhat chung work permit an phihpiak hna. Cun, rian a ṭuan bak lo mi pawl zong guaranter an um lo caah rianṭuannak nawl an ngei lo, tiah theih a si. NLD cozah chan ah Laos le Tachileih kalnak ding ah hin 100,000 MMK lawng a dih nain Min Aung Hliang nih uknak a laak hnu cun 130,000 MMK pek in kal a si cang, tiah theih a si.

Cupinah mahle umnak hmun ah kir a duhmi pawl zong Tuluk miphun company ngeitu pawl nih cazin an laak dih hnu lawng ah an kir kho. Laos palek pawl nih company ID card an ngeih le ngeih lo an check hna i ID card cu an laakpiak hna hnu ah minung pakhat ah baht 5000 in an tlanhter hna. Khualei kir a duh mi pawl cu harnak an tong lio, tiah theih a si.

Atu ah hin Golden Triangle hmunhma i a ummi Myanmar ram mi hna cu company ngei pawl nih anmah duh ning in phunphai an tuah mi biahrennak he rian an ṭuan i, Tuluk mirum pawl nih Myanmar ram mi cu an sehsat tuk hna tiah theih a si. Laos ram ah Myanmar mi pawl harnak an ton mi kong ah Myanmar Embassy ah rianṭuantu pawl nih an report ko nain atu tiang ahcun hmalaknak an ngei rih lo, tiah theih a si.

Choh Peng Ah Kum Tling Lo Ngakchia 20 An Tlaih Hna: Magwe ramṭhen, Choh peng ah kum tlinglo ngakchia 20 hrawng an tlaih hna i an tuk an velh hna, tiah Magwe mipi runvengtu committee nih February 23 ah cathanh an chuah. Choh peng Swe Pan Tuang Singlan Supyi Ye hmunhma ah ralhrang duhlonak catlap hna an benh ruangah February 21 ah kum tling lo ngakchia 20 ralhrang nih an tlaih hna, tiah Magwe mipi dothlennak committee hruaitu U Chit Mg nih DVB ah a chim.

Kum tlinglo Nu 5 telin minung 20 hrawng an tlaih hna i pa ngakchia pawl an chiatha ah kuakci(mei) in an sawh i an chek hna tiah theih a si, tiah a chim. Ralhrang nih ngakchia hna cu ningcang loin an tuahto ning cu hngakchia hna zalonnak nuhrin covo zei an rel lo a si. Hi kongkau hi ṭuanva kan laak hrimhrim a hau, hngakchia pawl an luat nakding ah kan i zuam cuahmah ko, tiah a chim.

Karmine Gate Pawng ah KIA Le PDF Phufonh Nih SAC Ralhrang Bomb Puah Hna: Kachin ramkulh, Hpakant khuapi Karmine myo, Myitkhyina-Hpakant lam hmunhma a remnak Karmine gate kam ah KIA le PDF phufonh nih February 24 zing sml 6 hrawng ah an va kah hna, tiah khua mi sin in theih a si. Karmine gate um mi SAC ralhrang hna cu Karmine Bauhakung (ကာမိုင်းဗျူဟာကုန်း) lei in an hawile bawm ding in a ra mi hna cu KIA le PDF phufonh nih an kahdoh hna i ralhrang lei in a thi mi an tam kho, tiah khua mi nih an chim.

Kahdohnak hi minute 50 hrawng a rau i, Chun sml 12:00 tiang Karmine gate cu an khar ruangah khualtlawng pawl lam ah an taang, tiah an chim. Kahdohnak ruangah Karmine gate i a um mi Maung Oo cu a thi i a fapa le 2 zong hliam an tuar, tiah theih a si. Maung Oo cu ralhrang lei thawngpetu a si ti zong in an chim. A fapa pahnih chung in pakhat cu a kut ah hliam a tuar i pakhat cu a kup ah hliam a tuar, tiah theih a si. Kahdohnak a dih in gate-hngak SAC ralhrang 3 cu KIA nih an tlaih hna i meithal cheukhat zong an laak. Karmine gate cu SAC ralhrang nih an hngah i, chekhlatnak an tuah peng hna, tiah theih a si. crd: The Chin Post