Press "Enter" to skip to content

Ralbawi Hlun Tin Maung Aye Cu Dalan Tuan In Ralhrang Pawl Thawng A Pek Peng Hna,Cun PDF Cawlcanghnak A Hlat Hlai Peng Caah A Inn Bak Ah Va Thah Asi.

Yangon, North Dagon ah nihin February 3, zanlei ah ralhrang rian in pension a la cang mi ralbawi pakhat cu amah inn cia ah fimtawl a si, tiah theih a si. Thah a tong mi ralbawi hlun, amin Tin Maung Aye cu Khah-Lah-Yah 241 ah a hnu bik rian a ṭuan, tiah theih a si. Atu dohthlennak ah ralhrang sin thawng a pek lawng siloin PDF pawl an cawlcanghnak a hlattu le a ngiathlaitu a si caah kan fimtawl hi a si, tiah Khuachung thlithup kahdohnak lei ṭuanvo ngeitu pakhat nih a chim.

“Ko Tin Maung Aye cu ralhrang nih uknak an laak hnu ah lam a zawh mi mipi pawl a ṭhentu a si i, ralhrang hna sinah a cawlcang peng ve mi a si. Ralhrang cohlannak puai tuah mi pohpoh ah a hruaitu a si. A umnak sang mipi nih an rem lo ngai mi a si nain ralhrang nih khinh mi rianṭuantu sanguk bawi vialte he an i theihhngalh caah mipi nih zeitin an ti ngam lo mi a si,” tiah Ko Tin Maung Aye he aa naihniam mi pakhat nih a chim.

Khuachung ah a thlithup in kahdohnak a tuahtu in ṭuanvo ngeitu phu nih North Dagon i ralhrang pa a inn kutka tawh cu kan hrawh i, a inn chung ah kan fimtawl, tiah thawng an thanh.“Kanmah khuachung thlithup kahdohnak ṭuanvo ngeitu phu cu ralhrang bantuk in kan hmuh mi poh kan kap hna lo. Nihin i ralbawi hlun Tin Maung Aye kan fimtawl lio zong ah a chungkhar pawl kan hmuh ko hna nain amah pakhat lawng kan fimtawl.

Rangoon khua ah a um i ralhrang he pehtlaihnak a ngei mi pohpoh ralrin kan in pek hna. Khoika hmun nan um zong ah kan in fimtawl khawh ko hna. Cucaah a ṭha bik mi cu ralhrang he pehtlaihnak ngei hlah u. Ralhrang sin thawngpetu na si ahcun na umnak hmun poh ah fimtawl khawhnak ding thazaang kan ngei, ti hi rak thei u,” tiah khuachung ṭuanvo ngeitu pakhat nih ralrin peknak bia a chim.

Be First to Comment

Leave a Reply

Your email address will not be published.