Ralhrang Hna Nih NUG Palai Le ASian Palai Ton A Onh Hna Lo
National Unity Government (NUG) Palai pawl le ASEAN Palai hna ton ding i ASEAN ram cheukhat nih an forh fialmi cu ASEAN zulhphung buarnak a si, tiah SAC ralhrang Foreign Ministry zung nih nizaan February 20 ah a thanh. CRPH le NUG hna cu ralhrang an si, tiah SAC ralhrang nih thanh ciami a si caah hi hna he vai ton le vai chawnhbiak cu ASEAN zulhphung buar a si pin ah ASEAN nih ai hmaithlak mi remdaihnak lam caah dawnkhantu a si kho, tiah SAC ralhrang nihcun a thanh.
SAC ralhrang zong cu NUG nih ralhrang an si, tiah a thanh ve. Combodia Foreign Minister Prak Sikhonn cu ASEAN Palai dirhmun in March thla ah Kawlram ah a ra lai i SAC lutlai cheukhat hna he tonnak an ngei lai, tiah theih a si. ASEAN Palai Myanmar a tlawn tik ah SAC he lawng tonnak ngei lo in NUG he zong tonnak an ngeih awk a si, tiah Malaysia Foreign minister nih ASEAN Foreign minister tonnak ah biatung a rak chuahnpi.
ASEAN nih SAC he tonnak le pehtlaihnak an ngeih mi hi SAC ralhrangbu an dirkamh bantuk a si caah pehtlaihnak le tonnak ngeih lo ding in Human Rights phu hna le NUG nih an soisel. ASEAN le Myanmar hnatlaknak biatung 5 hna cu SAC ralhrang nih an zulh khawh lo caah naite i tuahmi ASEAN Foreign Minister tonnak zong ah SAC Foreign minister ai tel kho lo. Hi nih hin SAC ralhrang cung ah ASEAN ram pawl zong an lung a dong ngai, tiah a langhter.
Ralhrangbu nih an kham caah Czech Republic ram bank pakhat nih a hrenmi tangka US dollar vialte cu Czech cozah nawlpeknak bantukin NUG nih an chuah khawh cang tiah theih a si. Naite ah NUG cozah ṭuanvo ngeitu hna lei Czech ramleng vuancizung upa hna tonbiaruahnak an ngeih hnuah atu bantukin NUG nih an tangka an chuah khawhnak hi a si.
NUG cozah nih dohthlennak caah tiin ramleng ah bawh an halmi le tangka catlap (bond) an zuarmi he pehtlai in Czech le Singapore hrambunh bank cheukhat ah bank account an on. Bawmh an halmi le tangka catlakp 9bond) an zuarnak in an hmuhmi tangka hna cu dohthlennak ah hman dingmi an si caah bank nih tangka chuah piak lo dingin ralhrangbu nih an kham caah bank hna zong nih NUG tangka cu an hren piak hna.
NUG hruaitu hna nih cun bank ṭuanvo ngeitu hna sinah thilsining an chim lengmang ko nain an chuah piak duh hlei hna lo. Cucaah Czech ramleng vuancizung upa hna he tonnak an ngeih hnuah thilsining an chimh hna i cuticun NUG tangka cu chuahnak nawl an pek hna hi a si. NUG hruaitu pakhat nih cun “Tangka kan chuah khawh cang caah a herhnak zawn ah bawmhnak zong kan pek khawh pah cang lai” tiah a chim. Ref: The Irrawaddy, the chin post
Shan le Karenni (Kaya) ramri um mi Mubae (မိုးဗွဲ) khua cu nizan February 20 ah ralhrang nih vanlawng in a kah hna caah Mubae (မိုးဗွဲ) peng mizapi vengtu ralkap pakhat hliamhma a tuar, tiah Mubae (မိုးဗွဲ)-PDF phu chungtel pakhat nih a chim. Nizan February 20, zaan suimilam 12:00 hrawng ah Mubae (မိုးဗွဲ) khua cu vanlawng pakhat he SAC ralhrang phu nih an rak tuk hna, tiah Mubae (မိုးဗွဲ)-PDF chungtel pakhat nih a chim.
“Vanlawng in bomb tamlakte an thlak nain hliamhma tuar cu an um lo ti tluk a si, vanlawng in bomb an thlak hnu ah ralhrang phu hna nih hriamngan he an kan kah,” tiah a chim chap. Ralhrang phu hna cu February 15 in Mubae (မိုးဗွဲ) ah ralhrang ralkap thazaang 200 leng le raltuknak motor 2 he an lut i Karenni hriamtlai phu hna he February 20 zinglei tiang pehzul in an i kap.
Ni 5 chung kahdohnak ah ralhrang phu lei in minung 50 hrawng an thi i, Karenni hriamtlai phu lei in minung 20 leng an nunnak a liam, tiah mizapi vengtu ralkap phu lei nih an chim. The Chin Post
