Ralhrang Le Karenni Ralkap Suimilam 10 Leng Lo An I Kap Cang
Nizan January 23 ah Karenni ramkulh, Demosso peng, Hopheih(ဟိုဖိတ်) khua le Saihkun-2(စိုက်ကွင်း) khua lei ah ralhrang an kal i, an kal lio ah Karenni ralkap nih an rak kah hna. Karenni mizapi vengtu le ralhrang hna hi sumilam 10 chung hrawng an i kap lai, tiah ruah a si. Ralhrang nih an umkalnak ah mipi inn zong an khangh pah, tiah theih a si.
Nizan kahdohnak kong he pehtlai in Kareni ralkap nih cathanh an chuah mi ah a langh ning ah cun, Zingka suimilam 8:00 in zanlei suimilam 6:00 tiang an i kap i, ralhrang a thi mi zong an tam. Karenni ralkap pakhat hliamhma a pu. Hopheih le Tapyitaw khua ah mipi inn 9 cu mei in an khangh. January 22 zong ah Hopheih le Tapyitaw khua i kahnak a fah tuk caah khua mi tampi an zaam hna i, a zaam manh lo mi khua mi pahnih cu ralhrang nih an tlaih hna i an thah hna, tiah KNDF nih cathanh an chuah fawn.
thawngdang rel ding..January 18, zinglei suimilam 3:45 ah Pinlebu (ပင်လည်ဘူး) khuachung ralhrang le palik nih umhmun an khuarnak sakhan cu mizapi vengtu ralkap nih an doh hna i ralhrang lei ralbawi minung 2 telh in ralhrang chungtel minung 20 hrawng an thi i, PDF lei in minung 2 an nunnak a liam ve, tiah People Revolution nih cathanh an chuah. NUG runvennak vuanci zung lei nih cathanh an chuah ning ah Sagaing ramṭhen, Pinlebu (ပင်လည်ဘူး) khuachung palik sakhan le ralhrang phu hna sakhan cu mizapi vengtu ralkap PDF nih January 18 ah luhhnawh in an doh hna.
Cu kahdohnak ah cun ralhrang phu minung 6 an nun bu in an hriamthil he tlaih an si lengah ralhrang chungtel tampi an thi, tiah an langhter. January 18 zinglei suimilam 3:45 ah Pinlebu (ပင်လည်ဘူး) khuachung palik sakhan le ralhrang phu umhmun khuarnak cu mipi ralkap nih an doh hna i cu dohnak ah cun ralhrang phu chungtel tampi an thi, hliamhma tuar zong an tam. PDF lei in minung pahnih an nunnak a liam i minung 8 nih hliamhma an tuar, tiah NUG nih an cathanh chuahmi ah an langhter. Khit Thit Media
