Ralhrang Le PDF Kahdohnak SAC An Sungh Tuk Caah Raltuknak Vanlawng An Hman

Shan-Kaya Ramri Kahdohnak Ah SAC Ralhrang Leikap Ah Faktuk In An Sungh Caah Vanlawng Hmangin Bomb Thlak! Shan ramkulh le Karenni ramri simi Wa Yi Su Pa Laing, Lyi Wei, Wei Te Gu leikap ah Febuary 19 nikhat chung kahdohnak a fak ngaingai i, SAC ralhrang ralkap leikap ah bawi telh in (40) lengkai an thi i, mipi vengtu leikap zongah nunnak liammi an um tiah DMO-PDF nih cathanh an chuah.

Thazaang chah taktakin kahdohnak a tuahtu SAC ralhrang ralkap cu: DMO Local PDF, Mu Be PDF, Loikaw PDF, Phe Khung PDF, KA, KNDF, KGZ, JPDF, GZ-21 le an hawile phu dangdang he i fonh in an kah hna caah SAC ralhrang tamtuk an thih pinah an motor (3) bak cu an rawk dih.

Kahdohnak caan chungah faktuk in a sunghmi SAC ralhrang ralkap phu cu ခမရ ၄၃၂တပ်, ခမရ ၅၄ တပ် leikap in hriamngan hmangin an kah bawmh pinah zanlei sml 4:00 hrawngah raltuknak vanlawng ngan (2), zanlei sml 5:00 hrawngah raltuknak vanlawng (2) hmangin vawi (9) bak bomb an kan thlak hnawh tiah an langhter.

Kahdohnak caan chungah Demosu PDF pakhat Mg Daw Myi Nit nunnak a liam tiah theih a si. SAC ralhrang ralkap nih Wa Yi Su Pa Laing le Wei Te Gu leiah himnak hmunah a zaam cangmi hna i an kaltakmi inn 10 tluk cu mei in an khanghpiak hna tiah theih a si. Credi; The Federal Times

Chin Miphun Ni Kongah ah Interim Hakha Townsip Administration Cathanh! Min Aung Hlaing le a Ralhrang hna nih nawlngeihnak an lak ruangah kum 74 chin miphun ni cu, ralhrang uknak duh lo langhternak lamzawh pah in kan rak hmang hna. Cu bantuk thiamthiam in tu kum chin miphun ni zong hakha khuachungah cun hlunghlai ngai in a hmang kho ding dirhmun kan si lo.

SAC ralhrang nih ramchung mizapi an kan tuahto ning a chiat lengmang cu zapi hngalh a si. Fimcawnnak kongah siseh chawlehnak kongah si seh, nifatin nun khuasak kong siseh, a lam kip in mizapi cu harnak a kan pek. Kan sunsak i hlunghlai ngai in kan rak tuah zungzal mi kan Chin Miphun Ni kong hmanh ah kanmah tein khuakhan lairel zalonnak chuh dih a kan timtu ralhrang hi chin miphun nih lungrual tein kan tei hlan lo kan doh hna a herh.

Kanmah kong ah kanmah tein khuakhan le lairel khawh kan duh i, federal democracy tlamtling in a nun khawh nakhnga mizapi nih ram kan khelh cuahmah lio a si bantukin, kan Miphun Ni ah SAC ralhrang nih khuakhanpiak mi cawlcanghnak le program tete zong um ai kun, mizapi lei in i tel tum hrimhrim lo ding zong chin miphun zapi kan rian a si.

Cu a si caah, hramhram uknak kan duhlonak, kan dohnak le kanmah tein a uk hruai kho mi kan sinak langhternak ah kum 74 Chin Miphun Ni cu aho hmanh leng chuak lo in mah le inn cio ah ulh a si lai, tiah Hakha khuachung mizapi upatnak/ hmaizahnak he thawng kan in thanh hna. credit; the chin post

Leave a Reply

Your email address will not be published. Required fields are marked *