Ralhrang Nih An Tlaih Mi NLD Party EC Chungtel U Lay Ko ko Cu Biaceih Hram An Thok Piak Ve Cang
Ralhrang nih an tlaih mi Yangon ramṭhen, Kaw Hmu(ကော့မှူး) peng NLD party Executive Committee(EC) chungtel U Lay Ko Ko cu phungrelnak caang 505 (a) in tazacuai a tong i, nihin March 4 ah Kaw Hmu peng biaceihzung nih biaceih hram an thok, tiah a chungkhar he aa naihniam mi hna sin in theih a si
“Phungrelnak caang 505 (a) in SAC ralhrang nih taza an cuai i, nihin march 4 ah Kaw Hmu biaceihzung nih biaceih hram an thok. March 14 ah biaceih ṭhan a si lai,” tiah a chung khar he aa naihniam mi nih Mizzima ah a chim.U Lay Ko Ko hi kum 56 a si i Kaw Hmu peng NLD party EC chungtel le Ministry of Information ah hruaitu zong a si. Phungrelnak caang 505 (a) in tlaih ding in nawl chuah mi ah aa tel ve mi a si.
February 28, 2022 ah Kaw Hmu peng Aphyoh(အဖျောက်) khua a inn ah chungkhar rian herh in an kal lio ah SAC ralhrang le phosawthi phu nih motor 2 le ralkap 10 in lam an kham i an tlaih. An tlaih lio ah hin an tukvelh pah i hliamhma zong a pu, tiah theih a si. SAC ralhrang nih uknak an laak hnu in Myanmar ram ruahnak petu Daw Aung San Suu Kyi, President U Win Myint le NLD party hruaitu tampi hna cu SAC ralhrang nih an tlaih hna i, case phunphun in taza an cuai hna.
thawngpang dang..Yinmarpin Le Madara Ah Lamtan In Ralhrang Bomb Puah An Tong: Sagaing ramṭhen, Yinmarpin peng, Swe Tuang Oo in a rak ṭum mi SAC ralhrang hna cu March 4 zanlei Sml 11:11 hrawng ah Bo Tun Toh( ဗိုလ် ထွန်းတောက် ) hruai mi TTPDF phu le Mahar Ming Tat Puang Suh (မဟာမိန်တပ်ပေါင်းစု) nih meng 5 gate pawng ah bomb an puah hna i SAC ralhrang 4 nak tlawm lo an thi, tiah
TTPDF phu nih cathanh an chuah. Bomb puah a ton hnu ah SAC ralhrang phu pawl umhmun an khuarnak Banhboi khua ah SAC ralhrang mawṭaw 2 an phan chap i, ralkap thazaang an chap, tiah theih a si.Mandalay ramṭhen, Madara ( မတ္တရာ) peng, Inn Gin Myiang Lay Kyiang Yan(အင်းကြင်းမြိုင်လေကြောင်းရန်) mizapi vengtu ralkap hna nih cycle 12 in minung thazaang 24 in ralhrang hna cu Kyaukse Lay khua le Kin (ကင်း)khua karlak ah March 4 ni zing Sml 11 :00 hrawng ah mizapi vengtu ralkap phu 2 i bawm in bomb an puahhnawh i SAC ralhrang 12 nak tlawm lo an thi, tiah Pah – Kah-Phah-Madara ralkap phu hna sin in theih a si. Ralhrang hna cu mizaw phor mawṭaw 2 le probox mawṭaw 2 in hliam a tuar mi le a thi mi hna cu an kalpi hna.
