Ralhrang Nih Mipi Hriamtlai Sakhan An Lak Hui
Sagaing ramṭhen, Kalaymyo nitlak thlanglei ah um mi PDF-Kalay battalion 3 sakhan cu nizaan April 12 zinglei suimilam 9:30 ah SAC ralkap minung thazaang 150 he an luhhnawh hna caah kahdohnak a chuak. Cu kahdohnak ah cun mizapi vengtu ralkap pakhat a nunnak a liam, sakhan kam i hmanh mi bomb a puah ruangah SAC ralkap tamlak an thi lai, tiah PDF-Kalay nih an thanh.
SAC ralkap nih hriamngan he pehtlai in an kah hna hnu ah cu sakhan ah cun an lut i, hriam thazaang aa thlau tuk caah PDF-Kalay battalion 3 nih cun an sakhan cu an chuahtak, tiah theih a si. Kalaymyo nitlak thlanglei Pyidawta khua lei ah SAC ralkap minung thazaang 300 hrawng nih rallam hmunhnih in an sial i, nihin April 13 zinglei suimilam 10:00 hrawng ah PDF-Kalay, Zomi PDF, PDA, CNDF, CDM-Siyin, pah-kah-phah phufonh hna he an i kap.
Chunhnu suimilam 3:00 tiang fak ngai in an i kap i, cu kahdohnak ah cun PDF-Kalay in minung 3 an nunnak a liam. SAC ralkap lei in a tlawmbik minung 5 an thi ve lai, tiah PDF-Kalay nih an thanh. Cun Kalaymyo khuachung ah nizaan zaanlei le nihin April 13 zaanlei suimilam 6:00 hrawng ah SAC ralkap le tualchung hriamtlai phu kahdohnak a chuak, tiah khua mi nih an chim.
Khuachung kahdohnak a chuahnak hmun cu Tahan sang ah a si i, Kalaymyo vanlawng tual pawng in kahdohnak a chuahnak hmunhma cu SAC ralkap nih hriamngan in an kahbawmh hna, tiah theih a si, cu kahdohnak ah kaphnih a thi mi le hliamtuar kong ah fehternak a um rih lo.
Magwe ramṭhen, Pauk peng, Tetkekyin khua tel in khuate 4 cu SAC ralkap nih nihin April 13 zinglei ah an luhhnawh hna i an duah hna caah Tetkekyin khua inn 60 hrawng a ciam dih, tiah theih a si. “Khualai ah a um mi Mawṭaw lampi in nichuahlei le thlanglei kap inn pawl an duah hna i, hmundang lei ah cun mei a lawn lem lo, nichuahlei kap zong ah a kang lo mi inn tlawmpal a um. Ka ruahdamh ning ah inn 60 tluk cu a ciam ko lai dah.
SAC ralkap an ra ṭhan lai ti thawngpang kan theih caah khuachung mei cu hmit ta dih loin kan chuahtak,” tiah khua mi pakhat nih a chim. Tetkekyin khua hi inn 440 an um. SAC ralkap nih cun Pauk peng, Siahla, Taungcho, Tasu, Letpanhla, Tetkekyin le KyauhOo khua hna cu April 11 thok in an duah thluahmah i tualchung mi 10,000 leng cu a himnak hmun ah an zaam cang. The Chin Post
