Ralhrang Tam Tuk Lawmmam An Thi

Hakha Le Falam Karlak Kahdohnak Ah SAC Ralhrang 40 Hrawng An Thi. Nizan March 2, 2022 Falam in a rak i thawh mi SAC ralhrang hna le Chin miphun ralkap CNA kahdohnak a chuah caah CNA kamh mi bomb nih SAC ralhrang pawl a puah hnawh hna lawng siloin kaphnih karlak ah kahdohnak a fah caah SAC ralhrang minung 40 hrawng an thi.

CNA ralkap in Salai Van Bawi Bik, Salai Za Hnin, Salai Thiang Bik Lian nih miphun le ram caah an nunnak an pek ve. SAC ralhrang an thih tam ruangah Dokțhek khua inn dihlak ngawt an khangh, tiah theih a si. (Video: CNA nih Kawl ralkap pawl lamthlur an kal cuahmah lio ah bom puah hnawh lio). Credit: The Chin Post

Kanpetlet peng, Kyindway(ကျင်ဒွေး) khua in Saw peng Laungshi(လောင်းရှည်) khua lei ah a rak chuak mi SAC ralhrang hna cu Swallinkyin(ဆွဲလင်းကျင်း) khua le Mahsmartwe(မဆွာတွီ) khua karlak ah Febuary 28 ah Laungshi PDF le CDF Kanpetlet (ကန်ပက်လက်) i fonh in an kahdoh hna i SAC ralhrang lei in 10 nak tlawmlo an thi i hliam a tuar mi zong an tam, tiah Laungshi PDF nih thawngthannak an tuah.

Zing sml 8:90 in zanlei sml 4 :00 tiang an i kap i, mizapi vengtu ralkap phu pawl nih hriamngan in voi 18 hrawng an kah hna i SAC ralhrang pawl mawṭaw cu tam ngai a rawk i mizapi vengtu ralkap phu pawl cu hliam tuar lo tein hnu an tawlh kho, tiah theih a si.

Kyindway(ကျင်ဒွေး) ah a rak kir ṭhan mi SAC ralhrang phu pawl cu an rak kir pah in khuakip ah lut in mipi an hrem hna, an thil an chuh, an fir, an hrawkpiak hna. Mizapi vengtu ralkap phu pawl nih February 26 le 27 nihnih chung ah caan laak in an bawh hna i an kahdoh hna, tiah theih a si.

Sagaing ramṭhen, Yinmarpin pengkomh ah February a zarhthumnak chung ah SAC ralhrang le Yinmarpin pengkomh PDF phufonh karlak ah kahdohnak a chuak i Ralhrang 30 leng an thi i 50 leng hliam an tuar tiah kan theih, tiah Myawatymar mizapi vengtu ralkap hna nih nihin ah cathanh an chuah. February thla zarhhnihnak in zarhthumnak tiang ah kahdohnak voi 17 a chuak i, PDF lei in pahnih an thi i, 5 hliam an tuar, tiah theih a si.

SAC ralhrang nih February thla zarhthumnak chung lawng ah Chinpone(ချင်းပုန်း) khua le Tapyayaay(သပြေအေး) khua pawl cu mei in an khangh hna ruangah inn 100 leng a kaang i mipi 11 hrawng thah an tong, mipi cheukhat zong tlaih an ton pin ah vanlawng in voi 4 kah an tong, tiah Myawatymar(မြောက်ယမား) mizapi vengtu ralkap phu sin in theih a si.

Mandalay Ah Kutṭem Buin Thah A Tongmi Mino Pakhat Ruak Hmuh A Si: Mandalay ramṭhen, Mandalay khuapi chung Lam 35, Tisor tlang kainak lam kiang ah a um mi hmunthur bawm pawng ah an hlawnh mi mino ruak cu March 3 zinglei ah hmuh a si, tiah khua mi hna nih an chim.

Voice Of Mandalay phu chungtel pakhat nih, “Ruak cu zinglei ah hmuh a si i, mi vialte ih hnu ah an hlawnh mi si dawh a si. A thi mi mino ruak cu faak tuk in velh i a mitmu hna um ti lo,” tiah a chim. Thah a tong mi mino cu angki leng a nakmi hruk in, a kut cu hri in an ṭem i a orhlei mitmu a chuak mi hliamhma he a thi, tiah khua mi pakhat nih a chim. Credit: The Chin Post

Leave a Reply

Your email address will not be published. Required fields are marked *