Ralhrang Thazaang 100 Hrawng Le Mipi Vengtu Ralkap Kar Kahdohnak A Chuak

Monywa – Kalaywah motor lam ah a rak kai mi ralhrang thazaang 100 hrawng cu Motor lam mengtung 68 nak hmun ah mipi vengtu ralkap phufonh hna he hmaitonh an i kap, tiah theih a si. Min Kin Peng, Kyua Pin khua ah um hmun a khuar mi ralhrang hna cu February 18 ah Kyua Pin khua in an chuak i lam pawngkip um mi khuate hna ah an riak pah i dawr le inn hna an bauh i an thilri an lakpiak hna, an satil zong an thahpiak hna, tiah theih a si.

Cu ralhrang hna cu February 20 ni zinglei ah mizapi vengtu ralkap a fonh mi phu hna nih an kah hna i ralhrang 18 an thi, tiah kahdohnak ah atel mi PDF ralkap pakhat nih a chim. “SAC ralhrang pawl an rak kai ti kan theih bak ah an ratnak lam cu kan bawh cia cang hna i bomb in kan puah hna i ralhrang 18 an thi. Aa hliam mi le a thi mi an tam caah an tinh mi lam an zawh kho ti lo i an kir ṭhan.

A kir ṭhanmi ralhrang pawl cu kan dawi hna i kan kah ṭhan hna, a thi chap mi zong an um. Hliam a tuar mi zong an tam, cheukhat cu ṭhiangṭhunh ṭhawnh buin a kal mi zong kan hmuh hna. Ralhrang phu hna cu an kir ṭhan i Sit Hlin Chuang( စစ်လျှင် ‌ေချာင်း)Khua phak hlan deuh ah Minkin PDF bawm ding in a ra mi hna he hmaitonh in an i kap ṭhan,” tiah PDF pa nih cun a chim.

Ralhrang hna cu Tuang Twin hmunhma PDF, Min Kin PDF, Se khua (Karenni peng) PDF ralkap hna i bawm in an doh hna i, cu kahdohnak ah cun PDF lei in aa hliam mi le a thi mi an um lo. Sit Chuang(စစ်ချောင်း) khua mi pakhat cu a lu le a phei ah hliam a tuar i a hliamhma ah thinphan ding a um lo, tiah theih a si.

Afghanistan cozah sianginn siangcachim hna cu January le February thla caah bawmhnak kan pek hna lai, tiah UNICEF nih nizan Febuary 20 ah a thanh. Hihi ngakchia hna nih caan khel tein fim an cawn khawhnak ding caah a si, tiah an thanh chih. Tutan bawmhnak hi European Union (EU) hruainak in pek mi a si i Afghanistan ramchung ah siangcachim an zate 194,000 an um i thla khat ah dollars 100 cio in thla 6 chung bawmhnak phaisa an pek hna lai.

Afghanistan ram ah sianginn kaimi sianghngakchia dihlak 8.8 million tluk an um i anmah ca a chimtu siangcachim hna hi a biapi tuk mi an si caah atu bantuk in EU le UNICEF nih bawmhnak kan pek hna hi a si, tiah an langhter. A ra dingmi caan zong ah siangcachim tampi hna nih harnak tampi an ton rih ding a si caah pehzulh tein sianghngakchia nih fim an cawn khawh nakhnga lakhruak in bawmhnak pek kan pehzulh rih lai, UN nih $ 250 millions tluk a bawmh rih an herh, tiah Afghanistan UNICEF Palai Mohamed Ayoya nih a chim.

North Korea Nih Thongtla A Thong renglo Luatnak A Pek Hna: North Korea ram hruaitu Kim Jong Won Pa a thi cang mi Kim Jong II kum 80 tlin chuahcam February ni 16 ah Kim Jong Won nih thongtla a thong renglo a chuah hna tiah theih a si. Kim Jong II chuah ni hi N.Korea ram mi nih an sunsak i Day of the shining Star tiah an kawh i Public Holiday ah an hman mi ni a si.

N. Korea thongtla hna cu an tuk velh i an hrem tuk hna, thong chung ah eidin tha tein an pe hna lo, nu hna cu nupa sualnak an tuah pi hna tiah thawng a rak leng ngai. Hi thongtla an chuah mi chung ah hin mi cheukhat cu an hremtuknak hna ah an thi deng, kal zong an kal kho lo, tiah North Hamgyong khua mi pakhat nih RFA ah a chim. Thongtla an chuah mi chung ah ramkhel kong thongtla mi, mithah ruang ah tla mi le rithai sii ruang ah thongtla mi hna cu an i tel lo, tiah theih a si.

British Siangpahrang nu Queen Elizabeth II cu Covid-19 A Zaw: Kum 95 mi British siangpahrang nu Queen Elizabeth II cu Covid -19 zawtnak in a zaw tiah rayal family le BBC nih an langhter hnu ah covid zawtnak sii-ai he thlopbul a si i, cumpit tlangrai sawh deuh a si caah a ngandamnak cu a tha ngai ko, tiah theih a si. Queen Elizabeth II a rian a chawngtu ding a fapa upa bik Prince Charles zong a luancia zarhkhat ah Covid-19 zawtnak nih a rak tlak ve.

Queen Elizabeth 2 umnak Siangpahrang inn ah minung tam ngai Covid zawtnak an ngei, tiah theih a si. UK Prime Minister Boris Johnson zong nih Queen Elizabeth cu covid zawtnak in a dam zok khawh nakhnga thla a campiak nak kong le duhsaknak a hlanh nakkong amah a twitter account ah a taar. Crd: The Chin Post