Rallam Sialtu SAC Ralkap Hna Cu Mipi Ralkap Nih An Phomh Hna, Minung 4 Leng An Thi
KhinOo (ခင်ဦး) peng, YeeOo (ရေဦး) peng le Depeyin (ဒီပဲယင်း) peng aa tonnak ah rallam a sialtu SAC ralkap hna cu mizapi vengtu ralkap phufonh nih bomb in an doh hna caah SAC ralkap in minung 4 nak tam an thi, tiah Ganung(ဂဠုန်) ralkap nih cathanh an chuah.
Nihin March 13, zinglei suimilam 8:00 hrawng i SAC ralkap a dohtu hna cu Ganung (ဂဠုန်) ralkap battalion 3,(Pengkomh battalion-21 Black Army battalion), Ganung (ဂဠုန်) ralkap battalion 2 le battalion 4 phufonh hna an si, tiah theih a si. SAC ralkap bomb in a dohtu hna nih cun , “Min Swe Hnit(မင်းဆွေနှစ်) khua ah nunnak a liammi Ganung (ဂဠုန်) ralkap phu caah lehrulh kan chamnak a si,” tiah an chim.
Sagaing ramṭhen, Shwe Bo peng Sheihkhun khua palek sakhan ah umhmun a khuar mi SAC ralkap hna nih March 12 zing Sml 8 ah, lampi ah aa chawklet mi minung 3 cu an tlaih hna i an thah hna, tiah tualchung mi nih Yangon Khat Thit ah an chim. Lampi ah aa chawklet mi minung 3 hi banhla dum ah banhla phorh aa hlawhfa mi an si i, naam an i put caah ‘PDF nan si’ an ti hna i an tlaih hna. Nizaan zaanlei ah khualeng ah an va thah hna i an ruak zong an hlonh sawhsawh hna, tiah theih a si.
Tualchung mi pakhat nih cun, “Banhla phorh rian a tuan mi an si tiah kan theih. nizaan chunnitlak an hrem hna i zaan Sml 8:30/ 9 :00 hrawng ah an kahthah hna. A thi mi hi a ho an si kan thei kho rih hna lo. An ruak zong cuticun an hlonh sawhsawh ko hna. Ruak latu zong an um lo,” tiah a chim. Atu hi ShweBo peng, Seihkhun khua palek sakhan hmai ah a kal mi cycle le motor hna cu pakhat 3000MMK in 5000 MMK an hal hna, tiah theih a si. Credit: The Chin Post
Kawlram Zong Ukraine Bantuk A Si Timi Philh Hlah U, Tiah Europe Parliament Nih Vawlei Cung Ramdang Vialte Cu A Forh Hna!
Vawlei cung ramdang dang nih Ukraine kong hi biatak tein nan ruah bangin Kawlram ah democracy phung a rawk cangmi sersiam than khawhnak dingah philh hrimhrim hlah u tiah Europe Parliament nih an forh.
March 10 ah Europe Parliament tonbiaruahnak ah Parliament hna nih Kawlram boruak bangin Ukraine zongah a si ve tiah an chim.
Kawlram chungah mipi tiangin kahdoh an tong i, a bikin nu le ngakchia, Khrihfa le miphun te nau tibantuk cu tlaih khih le hremnak an tong hna i,
harsatnak a tongtu hna hi eidin awk um lo le zawtfah zongah thlopbulnak sii-ai umloin an tuar tiah an chim. Cupinah hramhram uktu ralhrang ralkap rual cu dantatnak pek dingin siseh a bikin central bank cungah phihkhamnak le dantatnak tuah dingin biachahnak an tuah cang.
March 10 ah Europe Parliament hna nih Kawlram kongah biachahnak an tuahmi ahcun kum 2020 thimnak le teinak cohlan ding, Daw Aung San Suu Kyi telh in ramkhel ruangah tlaih a tongtu dihlak thlah than dingin siseh mipi cozah a thar in sersiam than dingin nawlnak an tuah hi a si. Crd: Deltanewsagency
