Rallokap A Tanhtu Laimi Cheukhat Lungput Le Dirhmun

Rallokap A Tanhtu Laimi Cheukhat Lungput Le Dirhmun. Hitlukin asual mi Ralhrang Rallokap le an pu Mi Aung Hlaing hi Laimi le Krifa minih an tanh khawh hnga tiah khuaza ka ruat tawn. Kawlmi, Rallokap chugkhar le USDP hna hi minung an si ve hnga ti tiang khua ka ruat. Hmatpungtin pektlak an silo. Pathian a zumh tu zong an si bal lailo. Ka piangthar an ti zong ah ka zumh hna lailo tiah ka zailen tawn. An Kong ka ruah ah ka thin hung colh ve.

Ka pawng minung vialte ngiar dih, i sik ka duh i thah dih ka duh tawn hna. Rallokap le USDP poah poah cu Minung cazin ah khumh tlak an si lo. Inn zuat Satil cazin tu ah khumh ding ansi. Thawhhlawm le Satil fater bangin biakinn ah hei pek ding asiko tiah ka ti hi ka kum he aa ruup bak an si ve cang.

Thlanglei laitlang ka maw nu nih Rallokap atan tu hna kong a ka chim mi cu hitin asi. An pengtlang chungkhar pakhat rallokap a tuan liomi an um. An pa hi B.A adih hnu ah Rallokap a lut. A lut hmasa in senthum asi peng. Pension lai te ah Azakhabo (CSM) zarhkhat an benh. Hi pa hi an umnak kawlram ah Krifa Upa asi.

An Fapa pakhat hi Maymyo DSA ah an kai ter. Apa nih krifa si ruang ah bo a hmuh khawh lo cu si kaw, an Fapa no hmuh duh ah le ralbawi lianngan si awk ah Buddhist ah an lut. An Fapa cu kum tlawmpal ah bothum a hmuh. Jesuh le ralbawi athlen ngam tu laimi an si. Ralbawi si duh ruang ah Jesuh an hlawt.

Krifa an hawi le nih Kanmah NLD le Amay Suh sinah ra ve uh tiah an sawm hna. An duh hlei lo. Nannih nih NLD nan tanh bantukin USDP he Rallokap kan tanh ve bak hna tiah an leh hna. Ram hrawk tu hi Amay Suh asi. Buddhist zeirelo tu Amay Suh asi tiah mi an kan let ve. Palh tanh le kal sual asit.

USDP le Rallokap minung vialte nih MAH le Rallokap Sualnak an hmuh khawh ve lo, Nannih NLD nih Amay Suh a palhnak nan hmuh khawh lo bantukin asi ve ko tiah ninghngalh tukin mi ankan ti tawn. NLD le Amay Suh nan I hrut pi bangin USDP le MAH cu kan I hrutpi ve. Amay Suh caah thih nan ngamh bangin kannih zong MAH caah thih kan ngamh ve an ti ve.

CDM tuah lo tu Laipa palik pakhat cu Rallokap Anna an lak kum khat chungah senhnih in bokhat a hmuh. Buddhist na lut ahcun bohnih kan in pek lai an ti ve. Palik dang CDM lo laimi vialte rengkai duh ah asi. Bohmuh ding le rengkai awk ahcun Buddhist lut ah ready an si dih hna. Rallokap nih Dalaan ah an hmang ve hna. Anmah ruangah CDM tuahmi le CDF chungkhar an him ti lo.

Acheu an hrem, a cheu thong an thlak, a cheu Innlo duah piak, a cheu an inn an fir piak. MAH nih direct in harnak an kan pek siloin Kanmah laimi le laimi tu harsatnak le thihlohnak an kan pek tertu MAH le rallokap ansi. Laimi le krifa an kan hlawttu USDP le Rallokap minung ansi. Jesuh zong an hlawt. Zei kan tuah ti an hngalh baklo. By_ Zingtincuai Cinzah