Russia Nih Poland Ramri A Kah Te Lai Ti Hi US Nih Kan Ruah Ciami Si-Jake Sullivan
Ukraine nitlak lei Poland ramri cu Nizaan, March 13 ah Russia nih a kah i, “Hi kong hi US nihcun a hlankan pi in a kah te lai, tiah kan rak ruah cia mi a si,” tiah US National Security Advisor Jake Sullivan nih a chim. US mingiathlaitu le National Security hna caah Russia nih Poland ramri a kah hi khuaruahar ding si lo, Russia ralkap nih zeingai an tuah khawh lo caah Putin nih a lungsivangh le a thinhun celh lo ah atu bantuk in a kah hi a si, tiah Jake Sullivan nihcun CNN thawngzamh sin ah a chim.
Ukraine nitlak lei i ummi ICOS ralkap camp cu Russia nih March 13 ah hriamngan in a kah caah minung 35 an nunnak liam i, 134 hliam an tuar. Hi camp hi NATO ralkap hna nih Ukraine ralkap pawl training an pek tawn hna nak a si i, camp he meng 15 ai hlatnak Poland ramchung ah NATO ralkap cu an um i, NATO hmunhma chung ah Russia hriam tla sual sehlaw raldohnak a zual hma ngai mi dirhmun a chuak kho. Russia kahmi hriamngan hi NATO hmunhma chung a tlak ahcun NATO nih kan lehrul colh lai,” tiah US National Security Advisor Jake Sullivan nih cun CBS thawngzamh a chimh.
Russia nih Ukraine hi Chemical hriamnam hmang in a kap sual lai maw ti mi kong ah Jake Sullivan nih cun, “Russia nih, Ukraine nih Chemical hriamnam a ser tiah a puhnak zoh tikah Russia nih hin Chemical hriam hman ding ah ready a si ti kha a langhter ko, i khoika hmun le zeitik ah ti mi cu ruahdamh khawh si lo,” tiah a chim.
relchap…KNU brigade 4 hmunhma Baik-Dawei pengkomh ah SAC ralkap phu hna le KNLA kar kahdohnak a chuak ṭhan i, SAC ralkap bawi pakhat lengah chungtel tampi an thi i, an hriamthil le phaisa zong an laak, tiah theih a si. MA meithal 4, pistol 1, RPG 1, hriamngan 2, Myanmar phaisa, Thailand phaisa le ralhriam thilri dangdang zong an laak, tiah theih a si.
Kayin ramkulh, KNU brigade 6 hmunhma Kawkareik-Kyain Seikgyi motor lampi i um mi Wizakung(ဝိဇ္ဇာကုန်း) khua ah khualtlawng mipi phaisa a haltu SAC ralkap kuttang riantuan Border Guard Force(BGF) chungtel 2 cu nihin March 14 zinglei 8:30 hrawng ah meithal kahnak in an thi, tiah khuachung thawngzamhnak nih an langhter.
KNU brigade 6 hmunhma Kyain Seikgyi (ကြာအင်းဆိပ်ကြီး) um mi khah-lah-yiah 32 battalion hmai ah nihin March 14 zinglei suimilam 9:00 in 9:30 tiang SAC ralkap le KNLA phufonh an i kap i, suimilam 10:00 hrawng ah Kyain Seikgyi (ကြာအင်းဆိပ်ကြီး), Mingalakung(မင်္ဂလာကုန်း) nitlak lei ah kahdohnak a chuak ṭhan. Cu kahdohnak ah cun khua mi minung pakhat a nunnak a liam i, pakhat nih hliam a tuar, tiah theih a si.crd the chin post
