Press "Enter" to skip to content

SAC Ralhrang Chungtel Pakhat Nih Cunglei Bawi Hna Riantuannak A Phuan Cang

Karen ramkulh Hpapun khuapi hrambunh ralhrang ke-ralkap khah-mah-yiah 642 in ralhrang pakhat cu Jan 26 ah khan a hriamnam tling he KNU Mutraw District Birgade-5 sinah a lut tiah KNU Mutraw News nih a ṭial. KNU sinah a lutmi ralhrang cu Mg Myo Lwin Oo (kum 23) a si, a body number cu 548128 a si.

Cunglei bawi hna rianṭuanning ka duh lo caah atu bantukin ka rak zamnak a si tiah a chim. Mg Myo Lwin Oo nih cun “Ka rak zamnak a ruang cu an kuttang hna hi zaangfahnak ngei in rian an kan ṭuanter. Cun ti-rawl zong khim in an kan pe lo. Ti zong rikhiah in an kan pek. Cite le chiti zong kan ei kho lo.

An kan fialmi a tlamtlin lo sual ah cun an kan bengh, an lung kan ton hna lo ahcun an kan chuih, an kan lamh i an kan thongh. Kan hmai le kan hnakhaw ah an kan tuk. Anmah le anmah an i hmuhthiam lo tikah an kuttang hna cungah an phunzai, an kan sik peng. Cucaah ka rak zamnak a si” tiah a chim.

An kuttang hna cu ti-rawl khim in an pe hna lo nain anmah bawi deuh rual cu an duh zat in ti-rawl an ei peng tiah Mg Myo Lwin Oo nih cun a chimchap. Nawlngeihnak lak hnu in ralhrang tampi cu an zam i tlangcung hriamtlaibu le mizapi vengtu hna sinah an lut. KNU sinah ralhrang a lutmi hi 60 hrawng an si cang tiah KNU Brigade-5 nih cathanh an chuah. Crd: The Chin Post

Tedim pengchung India ramri hmunkhat ah khualtlawng mi minung 2 hna cu CNA nih lunghrinh in checknak an tuah hna i ting 80 mmk hrawng manngei rit-sii cu kan tlaih, tiah Chinland Information Center nih cathanh an chuah.

Lunghrinh an si caah checkhlatnak an tuah hna i rit-sii cu hmuh a si, cu thil a phortu hna cu Thawng Lam Sum le Lang Deih Cin an si i Bukphir khua mi an si, tiah cu cathanh chung ah cun an langhter chih. Bukphir khua cu ZRA an rak umbalnak khua pakhat a si i CNA he kahdohnak a chuah hnu ah cuka hmun cun an zaam, tiah theih a si, ti in Chinland Information Center nihan cathanh ah an langhter. The Chin Post

THAWNGPANG DANG: Gangaw Peng Thla 10 Chung ah YDF ralkap Le Khuachung Minung 76 An Nunnak A Liam ; Magway ramṭhen, Gangaw pengchung ah ralhrang phu hna nih nawlngeihnak an laak hnu dothlennak chung ah YDF mizapi ralkap in minung 44 nih ram le miphun ca ah an nunnak an pek i, khuachung minung 32 cu an nunnak a liam tiah theih a si.

Gangaw District | Mapio.net

Gangaw pengchung ah mipi ralkap le mipi hna chung in minung 76 an nunnak a liam, tiah Gangaw peng public administration phu nih nizan January 27 ah cathanh an chuah. Mizapi ralkap hna chung in nunnak a liam mi hna hi ruah lo piin bomb puahsualnak, bomb test lio ah puahsualnak in minung 11 nak tlawm lo an nunnak a liam.

Kum-18 tang nunnak a liam mi minung 14 nak tlawm lo an si, Minta(မင်သား) khua luhnak ah ralhrang phu hna nih hramhram in mipi nunnak an laak caah minung 18 an nunnak a liam. Hnankha(နှမ်းခါး) khua cu ralhrang phu hna nih vanlei in an kah hna caah minung 9 cu an nunnak a liam.

A luancia September thlakhat chungah nunnak a liammi hi minung 29 an si, tiah an langhter. Hmunhma humhimnak ruang le pehtlaihnak tlamtlin lo ruangah Gangaw pengchung in nunnak a liammi hna dihlak hi atu ah langhter mi nakin a tak ah nunnak a liam mi hi nakin tam deuh khawh zong a si, tiah Zalen nih an tial. (Mai Anna Par, TCP Journalist)

Be First to Comment

Leave a Reply

Your email address will not be published.