SAC ralhrang hna nih an hremnak hna ah nunnak a liam mi, civil mi hna ruak cu mei in an khangh hna

Sagaing ramṭhen, Yinmapin peng, Chinphung khua ah umhmun a khuar mi SAC ralhrang hna nih an hremnak hna ah nunnak a liam mi, civil mi hna ruak cu mei in an khangh hna i an nehnang an hloh, tiah theih a si. Khuachung um mi Mawṭaw, Saikel le seh thilri cheukhat hna he an ruak an khangh chih hna, tiah Chindwin Yoma Alliance Force nih nihin February 28 ah a thanh. Chinphung khua cu SAC ralhrang nih an luhhnawh caah khua mi nih khua an chuahtak nain mucu kai lio ngakchia 85 le khua mi tampi cu SAC ralhrang nih an hrenmi hna an um rih.

February 26 zing sml 9:00 hrawng ah Chinphung khua le a kiangkap khua hna cu SAC ralhrang nih mipi le PDF thleidang lo in Helicopter 6 in an kah hna i Chinphung khua cu ralhrang nih an rak luh hnawh. SAC ralhrang nih ngakchia an hren mi nu le pa hna cu ralkap nih ralphaw ding ah an tlaih hna, tiah khua mi hna sin in theih a si. An tlaih mi ngakchia hna hi Febrauay 26 ah Chinpung phungki sianginn le sianginn ah SAC ralhrang nih an tlaih mi hna an si.

“Phungki sianginn in SAC ralhrang cu laud speaker in an au i an fale rak la hna ding in an chimh hna. Nu le pa cheukhat an va kal ah, SAC ralhrang nih an rak tlaih hna i, an fa le pawl zong an thlah hlei hna lo,” tiah Chinpung khua mi pakhat nih Than Lwin Khet ah nizaan february 27 zaanlei ah a chim.

“SAC ralhrang nih cun khua mi cu an hrem hna i, an hremnak ah a thi mi; sualnak ngei lo miruak hna cu mei in an kangh hna. Mucu ngakchia 80 leng le tlaih a tong mi midang hna cu ti le rawl lo in an um ko,” tiah khuachung thawng zamhnak nih Febrauary 28 ah a langhter. Ngakchia hna cu thlahpiak ding in khua upa hna nih SAC ralhrang cu an nawl hna nain zei hmanh san a tlai lo, tiah khua mi pakhat nih a chim.

SAC ralhrang nih ngakchia an tlaih hnanak hi ni 3 a si cang i khuachung ah zei dah a cang chap ti hi kan theih khawh lo ruang ah nu pa hna cu an ṭap i lungrethei in an um, ngakchia va la ding in va kal ah le tlaih an tong fawn, zeihmanh tuah khawh a si lo, tiah Chinpung khua mi pakhat nih a chim. Credit: The Chin Post