SAC Ralhrang Le KNDF Kar Kahdohnak Ah Ralhrang 40 Leng An Thi, Mipi Hriamtlai Phu 10 Hrawng An Thi Ve

April zarh hnihnak chung ah Karen ramkulh peng hmun li ah kahdohnak a fak tiah KNDF nih an thanh. April 15, 2022, Karen ramkulh Peng hmun 4 chung ah, April zarh hnihnak ah Council ralhraang le KNDF kar kahdohnak a fak tiah KNDF nih an thanh.

Loikaw, Demoso, Hparuso le Bawlakhe peng ah Council ralhraang hna nih hmai an nawr ca ah kahdohnak a chuah hi a si tiah KNDF nih thanh mi in kan theih. Hmainawr in kahdohnak an tuah chung ah Council ralhraang hna nih khuami hna thah, Inn pawl khangh, khua chung ah hriam ngan kah le bomb tarhnak hna an tuah tiah KNDF nih an chim.

Kahdohnak chung ah Council ralhraang 48 an thi i KNDF tangti phukomh in 10 an thi. Council ralhraang hna nih raltuknak ah an hman mi motor pakhat le vawlei cawhnak theng pakhat zong kan hrawhpiak hna tiah KNDF nih an thanh. Source: The Irrawaddy Burmese, The Hakha Post

Relchap; March thla chung Gangaw le Hakha kar kahdohnak ah SAC ralkap 40 an thi tiah CDF- Hakha nih Nihin April 14 ah cathanh a chuah. April 14, 2022, A tanglei hi March 17 in March 31, 2022 (ni 15 chung) tiang CNA le CDF-Hakha i bawm in Hakha in Gangaw lei a kalmi ralhrang he i kahnak report a si. Ralhrang pawl hi Nipi an phak lio ah kan rel khawhmi vial cu minung 217 an si i,

hi chungah hin minung 40 kan thah khawh hna. March thla thawkka March 03 in 06 tiang, Kalaymyo in a rak kaimi ralhrang he kan i kap. Zarh khat tluk kan i dinh hnu ah cu ralhrang pawl cu Gangaw lam an rak zawh ṭhan i March 17 in March 31 tiang kan i kap ṭhan. Thawngpang kan rak theihning ahcun, hi ralhrang pawl hi Hakha in Naypyidaw tiang va kal i March 27 i an tuahmi Resistance day-တပ်မတော်နေ့ hlan ah Naypyidaw va phak ding kha an rak i tinhmi si.

Naypyidaw tiang cu van chim lo Rungtlang in Lungcawi tiang ah ni 15 an rau. Bawipa kilvennak le vawleicung ummi Chin miphun hna nan thlacampiaknak thawngin a thi lomi kan um lo. Hmapumi pakhat kan um. March thla chung cu raltuk lawngte kan si caah a thabaami kan lo pah nain, kan miphun luatnak le Federal Democracy hmuhnak caah rianṭuanmi kan si kan i fian tuk caah kan thazaang a tlung ko.

Kahdohnak thawngthanh ding hi, kahnak a dih kate ah thanh colh ding kan ti ko nain, ralhrang pawl kha Bungzung hrawnghrang ah a cikpak in an um lengmang rih caah tuan ah kan rak thanh khawh lonak a si. Cu kong ahcun kan mipi nih rak kan ruat thiam u. Ralhrang pawl an kal hnu ah an umnak ka vung zoh. Kan va hmuhmi cu, a thimi pawl ruak mei in an khanghmi hna a kaang kho lomi an ruh le an nehnaang vialte kan va hmuh dih (video le hmanthlak CDF-Hakha file chiah dih an si).

Ralhrang pawl nih hin an hawile a thimi pawl ruak mipi ralkap a simi CNA, CDF-Hakha le khuami nih hmuh ding hi an ṭih tukmi le an duh lo tukmi a si caah, zan an riahnak hmun ah mei in an khangh tak lengmang hna. Cu hnu hmanh ahcun an nehnaang hmuh awk um lo dingin an tuah. Mah bantuk hi, kan hnu Ramthlo in Hakha thar (March 03 in 06, 2022) kar kan i kah lio zongah Dokṭhek khua ah an tuah cangmi a si.

Zeitluk i an thuh len zongah an ruak an i khanghnak hmun cu an hlo kho hlei lo i an ruhro a tangmi nih biahman a chim ko tiah CDF- Hakha nih cathanh an chuah. #Ralhrang a thi mi cazin cu a tanglei ninghin an si. March 17 ah Nipi pawng ah SAC ralkap le mizapi vengtu ralkap CDF karlak kahdohnak a chuak . March ni 18 ah Zokhua le Nipi karlak ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 7 an nunnak a liam. Hakha CDF lei in a hliammi um lo tein hnu an tolh kho.

March 19 ni ah Zokhua le Nipi khua karlak thiamthiam ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 3 an nunnak a liam. Hakha CDF lei in a hliammi um lo tein hnu an tolh kho. March ni 21 Zokhua pawng ,SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 3 an nunnak a liam.Hakha CDF in a hliammi um lo tein hnu an tolh kho.

March ni 21 Rungtlang um SAC ralkap hna cu Mizapi vengtu ralkap Hakha CDF an kah hna i SAC ralkap 3 an nunnak a liam. Hakha CDF in a hliammi um lo tein hnu an tolh kho. March ni 21 Zokhua thlang ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 3 an nunnak a liam. Hakha CDF in a hliammi um lo tein hnu an tolh kho.

March ni 22 Zokhua pawng ,SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 3 an nunnak a liam. Hakha CDF lei in ralkap pakhat a kut ah hliam tuar. March ni 24 Ruavan Tlang ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 1 a nunnak a liam. Hakha CDF in a hliammi um lo tein hnu an tolh kho.

March ni 25 Tinam Tlang ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 6 an nunnak a liam. Hakha CDF in a hliammi um lo tein hnu an tolh kho. March ni 26 ah Lamtuk khuachung luhlai ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 2 an nunnak a liam.Hakha CDF in a hliammi um lo tein hnu an tolh kho.

March 28 ah SAC ralkap nih Tinam khua mipi inn 9 an duah piak hna. March ni 29 Lamtuk le Lungcawi karlak ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 3 an nunnak a liam. Hakha CDF in a hliammi um lo tein hnu an tolh kho. March ni 30 Lamtuk le Lungcawi karlak thiamthiam ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 4 an nunnak a liam.Hakha CDF in a hliammi um lo tein hnu an tolh kho.

March ni 30 Lungcawi ah SAC ralkap le Mizapi vengtu ralkap Hakha CDF karlak kahdohnak a chuak i SAC ralkap 2 a nunnak a liam.Hakha CDF in a hliammi um lo tein hnu an tolh kho. March thlachung ah SAC ralkap le CDF Hakha karlak kahdohnak voi 14 a chuak i SAC ralkap 40 an thi. CDF Hakha lei in hliam a kut ah hliam a tuarmi pakhat a um tiah theih a si. The Chin Post