SAC Ralhrang Le Mipi Vengtu Ralkap Kahdohnak Ah Ralhrang Nih Vanlawng An Hman Taktak Cang

Shan le Karenni (Kaya) ramri um mi Mubae (မိုးဗွဲ) khua cu nizan February 20 ah ralhrang nih vanlawng in a kah hna caah Mubae (မိုးဗွဲ) peng mizapi vengtu ralkap pakhat hliamhma a tuar, tiah Mubae (မိုးဗွဲ)-PDF phu chungtel pakhat nih a chim. Nizan February 20, zaan suimilam 12:00 hrawng ah Mubae (မိုးဗွဲ) khua cu vanlawng pakhat he SAC ralhrang phu nih an rak tuk hna, tiah Mubae (မိုးဗွဲ)-PDF chungtel pakhat nih a chim.

“Vanlawng in bomb tamlakte an thlak nain hliamhma tuar cu an um lo ti tluk a si, vanlawng in bomb an thlak hnu ah ralhrang phu hna nih hriamngan he an kan kah,” tiah a chim chap. Ralhrang phu hna cu February 15 in Mubae (မိုးဗွဲ) ah ralhrang ralkap thazaang 200 leng le raltuknak motor 2 he an lut i Karenni hriamtlai phu hna he February 20 zinglei tiang pehzul in an i kap. Ni 5 chung kahdohnak ah ralhrang phu lei in minung 50 hrawng an thi i, Karenni hriamtlai phu lei in minung 20 leng an nunnak a liam, tiah mizapi vengtu ralkap phu lei nih an chim.

Sagiang ramṭhen, Salingyi peng Wanbao Mining Copper Campany nih Copper an cawhnak hmun pakhat cu February ni 20 ah Shot Tite Done (ရှော့တိုက်) hriam in kan kah hna, tiah Monywa Red Fire PDF nih an chim. Tuluk Wanbao Capany ah ralhrang phu hna an chungkhawt pawl an dorter hna caah ralrin peknak ah PDF nih an kah hnanak hi a si, tiah theih a si.

Monywa Red Fire PDF in chimphunnak nawlngeitu Ko Philip nih, “Tlangcung ah sniper zong an um, ralhrang chungkhar pawl cu Wanbao Company chung ah an i dup ti thawng le Monywa le Ngawngpingyi ah mortar in an kah hnik ti thawng kan theih caah ralrin peknak phun in kan kan kahnak hi a si, atu tiang ah aa hliam le aa khawng mi cu an um rih lo,” tiah a chim.

Cu kahdohnak a chuah dih hna ah ralhrang nih minung thazaang 100 ke in ra i Wanbao lam tonnak ah an rak phan i Kaankung khua thlanglei ummi ar zuatnak farm pakhat an kangh, tiah theih a si. Wanbao Mining Copper Company hi 2010 ah ralkap le Tuluk company hna i bawm in an rak dirh mi a si. Ralhrang nih uknak an laak hnu ah cu company i riantuan mi hna cu February 9 ni thawk in duhlonak langter in lam an rak zawh bal. Crd: The Chin Post

Nizan February 20 cu Chin miphun ni a si caah vawileicung ramkip in Chin mi hna nih Chin Miphun Ni lawmhnak tuah a si. Tlanglei chinram mindat khuapi pengchung zong ah a voi 74nak Chin Miphun Ni cu CDF-Mindat control-nak hmun ah an tuah, tiah theih a si. Ralhrang nih Mindat khuachung ah thazaang chap in rallam an sial ko nain in Chin Miphun ni cu CDF uknak tang ah hlunghlai ngai in an hun tuah khawh. Mindat Chin Miphun Ni cu ramchung le ram leng ummi Chin mi hna i funtom in an tuah i, cun, ralhrang phu le Chin ralkap hna kar kahdohnak a chuahnak hmun Chin ramkulh cheukhat le khuate lei hna zong ah an tuah, tiah theih a si.

CNA headquarters Camp Victoria ah cun hlasakthiam- Guys From Chin hna he sunglawi ngai in CND an tuah i, CDF Thantlang zong nih CDF camp hmun pakhat ah voi 74 nak Chin Miphun Ni cu an tuah khawh, tiah theih a si. Ramleng um Chin Miphun hna lak in US le Australia Chin miphun hna nih cun hlunghlai ngai in CND lawmhnak puai an tuah theih a si. US ah cun Chin mi tam cemnak Indianapolis ah nizan February 19 ah khan CND lawmhnak cu hlunghlai le sunglawi ngai in an tuah theih a si.

Chin Community of Indiana nih CND an lawmhnak puai ah hin NUG, Union Minister of Intrnational Cooperation- Dr Sasa le Union Minister of Federal Union Affairs Dr Lian Hmung Sakhong le US Chin Community hruaitu hna nih biachimnak caan an ngei. Hi puai ah hin hlasakthiam hna nih mizapi a ra mi hna cu an awih hna i, laam thiam hna zong nih miphun laam zohnuam phunkip an zohter hna.

Mindat Khuami Minung 300 Leng Nih An Umnak Hmun An Zaamtak: Chin ramkulh, Mindat pengchung ah February 19 ah ralhrang phu hna le Mindat-CDF kar kahdohnak a chuah caah kahdoh a chuahnak hmun pawng ah a um mi khua mi minung 300 leng cu an zaam, tiah khua mi nih an chim. February 19 zinglei suimilam 11:00 hrawng ah Mindat peng Uaiye(အွယ်ရေး) khuakomh Ṭhalawng khuapawng hrawng ah ralhrang phu hna le CDF-Mindat kar kahdohnak a chuak i, Uaiye အွယ်ရေး khuakomh in Panpa, Tuaipalin(သွီပလင်း), Hliyaw(လှိယော), Hliyune(လှိရုံး), Kingyun(ကိန်းယွန်း), le Uaiye (အွယ်ရေး) khua in khuami minung 300 leng cu a himnak hmun ah an zaam hna, tiah theih a si.

February 18 in ralhrang thazaang 300 hrawng cu Vuamtu (ဝမ္မသူး) khua in an chuak i February 19 ah CDF-Mindat phu he an i kap, tiah CDF-Mindat in chimphuannak nawlngeitu Ko Yaw Mang nih a chim. “SAC ralkap hna cu February 18 ah Mindat in Vuamtu (ဝမ္မသူး) ah an ra i cuka hmun ah cun kahdohnak a chuak. Vuamtu (ဝမ္မသူး) khua ah lut in siizung thilri vialte meikhangh in an hrawh. February 19 ah voi hnih tiang in kahdohnak chuak ṭhan. Ralhrang phu hna cu minung thazaang 200 in 300 karlak hrawng an si. Zinglei suimilam 11:00 in zanlei suimilam 3:00 tiang kaphnih kar kahdohnak a chuak i CDF lei hliamhma tuar an um lo. Ralhrang phu lei in minung 3 an thi i minung 2 nih hliamhma an tuar.

“Ralhrang phu hna nih Vuamtu(ဝမ္မသူး) siizung ah power generator(မီးစက်) pahnih, sii-ai le siizung hmanmi thilri hna cu an hrawh dih. Ralhrang phu hna nih khuachung innkip an hrawhpiak hna, innchung thilri zong taang loin an hrawh dih, umnak hmanh ah an ṭha ti lo. Chungkhar cheukhat hna cu eiding caah harsa ngai in an um. Atu hi ralhrang nih lam an phih i, chekhlatnak zong an tuah caah bawmhnak thilri zong phorh khawh a si lo. Khuachung ummi hna zong chungkhar kip ah minung 10 cung um mi ca ah facang pi 10 lawng cawknak nawl an pek hna, ralhrang phu nih ri an khiahpiak fawn hna, Cycle pakhat ah dat-sii thawl 2 lawng zuar ding in ri an khiah fawn,” tiah ralzam pakhat nnih a chim.

Mindat pengchung February 19 kahdohnak ruangah ralzaam dirhmun in ummi an karh i, ralzaam dirhmun in ummi dihlak cu minung 3,000 leng an si cang, atu tiang ah an umnak khua cio ah an kir kho rih hna lo. A luancia February 2 ah khan Mindat in a hlatnak meng 30 ah kahdohnak a chuak i February 3 ah Mindat-Matupi lampi ah kahdohnak a rak chuak fawn. Cu kahdohnak a dih hnu zarhhnih a rauh hnu ah Mindat pengchung Thalawng (ထာလောင်း) khua pawng hrawng ah ralhrang le CDF-Mindat karlak kahdohnak a rak chuak. Chin ramkulh chung ralhrang phu hna le mizapi vengtu ralkap phu hna cu April thla thok in an i kap i, kaphnih kar kahdohnak ruangah ralzaam dirhmun a phan mi dihlak hi minung 30,000 leng an si cang, tiah CHRO nih cathanh an chuah. Crd : The Chin Post