SAC Ralhrang Minung 140 Hrawng Le Mipi Vengtu Ralkap Kahdohnak Fak A Chuak, Mipi Lei Hliamtuar An Tam
Chin ramkulh, Kanpetlet khuapi le Saw khuapi karlak ah SAC ralkap le tualchung hriamtlai kar kahdohnak a fak i hriamnam thazaang le minung thazaang ai dantuk ruangah tualchung hriamtlai a hliammi an tam tiah CDF Kanpetlet nih nihin April 22 chun ah lakhruak cathanh an chuah. Nizan April 21 ah SAC ralkap hna cu Saw khuapi in thazaang 60 leng in rallam 1,
Kanpetlet khupi in thazaang 80 leng in rallam 1 tiin rallam 2 i then i rallam an ser. Mizapi vengtu ralkap hna cu hriamnam thazaang a dantuk ruang le kaphnih rallam in an SAC ralkap nih an karceh hna caah a hliammi an tam tiah theih a si. Kahdohnak pehzulh in a fah chin caah mizapi nih Saw khuapi le Kanpetlet khuapi karlak ah tlunkal hrimhrim lo ding in ralrin pek nak cathanh an chuah. Crd; The Chin Post
Relchap; Nihin April 22, zaanlei suimilam 5:30 hrawng in Hakha khuachung ah phone line a tlau/a thih caah wifi le internet line hna hman khawh an si lo, tiah theih a si. Hakha khuachung ah suimilam 24 chung pehzul tein mei a um lonak zong thlahnih fai a si cang. Atu ah cun nikhat ah suimilam 4 tluk cu mei a mit peng, tiah Hakha um kan bialaknak nih an chim.
“Hakha khuachung ah wifi line zong voidang kel bantuk in hmanawk a ṭha lo line a rawh caan a tam, cun phone line le internet line zong a ṭhat lo caan a tam ngai,” tiah Hakha khuachung um mi pakhat nih The Chin Post ah an chim. Nihin April 22, zanlei suimilam 5:30 hrawng in zaan suimilam 7:30 hrawng tiang phone line a tlau/a thi. Zei ruangah phone line a tlau cu hngalh a si lo.
Relchap; Irrawady ramṭhen, Kyawngkung peng ah April 17 ah khan pa pakhat nih a nupi a hngawng a tan i a ruak a hlonh tiah theih a si. Watchaung khuakomh, Taminsaukkung khua mi U Khin Zaw ti mi pa cu a hawipa he an inn ah zuu an ding i a nupi cu zuu cawk chap a fial i a nupi nih a cawk duh lo caah a hngawng a tan, tiah tualchung mi hna nih an chim.
“U Khin Zaw cu a hawipa he zuu an ding i, a nupi cu zuu cawk a fial i a nupi nih a duh lo caah bia an i al i a nupi cu a hngawng a cik i a ruak cu tikhur ah a thlak,” tiah khua mi pakhat nih a chim. April 20 ah khan tikhur chung in miruak rim cu a nam tuk caah khua mi hna nih an char i lainawngtu U Khin Zaw le a hawipa cu Kyawngkung palek nih an tlaih hna i lainawn case in tazacuai an si, tiah DVB nih a ṭial.
