SAC Ralhrang Nih Minung 15 Thih Dan An Pek Hna
Yangon ramṭhen, North Okkalapa peng Hlaingtaya le Dagon Myotit Seikkan peng in Mino 15 hna cu SAC ralkap biaceihzung nih thihdan le thih hlan lo thong thlak ding in March 17 ah biakhiahnak an tuahpiak hna. Thih tiang thong thlak ding in biakhiahnak tuahpiak a tong mi mino hna cu Hlaingtaya in minung 8,
Dagon Myotit Seikkan in minung 3 le North Okkalapa in minung 4 an si i, cu chung ah cun nu pakhat aa tel. Cu mino hna cu, North Okkalapa ah high school siangcachimtu nu pakhat meithal in kahthah a tonnak kong le Hlaingtaya pengchung ah inn zakhat uktu kahthah a tonnak kong ah ‘pehtlaihnak an ngei’ ti in thihdan an pek hna hi a si, tiah SAC ralkap phu nih an cathanh ah an langhter ve.
Yangon khuachung SAC ralkap uknak lei nih cathanh an chuah mi sualphawtnak phun 23 chung in SAC ralkap biaceihzung nih chekhlatnak an tuah i, a sangbik sualphawtnak in biakhiahnak an tuahpiak hna, tiah theih a si. Credit: The Chin Post
Russia nih Ukraine a tuknak zarhthum reng lo a si cang i, Ukraine khualipi Kyiv tel in khuapi dang hna zong ah pehtlai in bomb a thlak peng. Cu lio ah US President Biden le China President Xi Jinping hna cu online in Russia le Ukraine kong ceihhmainak an ngei. Russia nih China sin ah ralhriam lei bawmhnak a hal ti mi thawngpang a chuah caah atu tan Ukraine buainak ah hin China cu a biapi ngai mi ram pakhat a si kho.
US nih cun China cu Russia sin ah ralhriam le Chawhlehnak bawmhnak pekter lo ding in kham ai zuam ve. US nih Ukraine tu cu ral hriamnam $800 millions man kuat ding ah President Biden nih a thanh cang. Atu tan China le US President biaruahnak kong he pehtlai in White House nih official in zeihmanh an thanh rih lo nain China nih President Putin a cohlannak kong,
Russia-Ukraine buainak ah China nih Russia sual a phawt duhlonak kong hna cu President Biden nih China President Xi JinPing hi hal a timh, tiah White House biachimnak nawlngeitu Jen Psaki nih President pahnih tonnak an ngeih hlan deuh te ah a chim. Nizan March 19, Suimilam 2 chung kaphnih President biaruahnak a dih hnu ah China Foreign Ministry nih cun, “Raltuknak nih aho ca hmanh ah ṭhathnemnak a chuahpi lo,” tiah an langhter ve.
Nizan, March 18, cawn ninga ni ah Russia nih Ukraine ram nitlak lei Lviv khuapi tiang Missile in a hei kah cang, tiah theih a si. Khualipi Kyiv zong faak chin lengmang in Russia nih cun a nam chin lengmang nain Ukraine cu ramdang nih ralhriam thazaang tampi in an bawmh peng caah nihin tiang aa chang rih.
