SAC Ralhrang Nih An Thahmi Chinpa Ruak Cu Chungkhar Hna Sinah An Pek Duh Hna Lo
Salai Shalom ruak chungkhar nih an hal nain SAC nih an pe duh hna lo. 2022 March 15 Sagaing Ramthen Kalay thonginn ah thah a tongmi CDNF ralkap Salai Shalom Siang Thang Lian ruak cu chungkhar nih SAC sin ah laak ding in nawl an hal nain SAC misual pawl nih pek duh loin 2022 March 16 ah a ruak an khangh tiah thawng theih a si.
A ruak laak ding in an halnak kong he pehtlai in, “A ruak laak i Falam lei ah a ruak vui ding in SAC sin ah nawl kan hal hna. A voi khatnak ahcun va tlung phot ulaw rak ra than te uh an kan ti. Asinain, tuzaan lei ahcun a ruak an khangh dih tiah thawng an kan thanh than,” tiah chungkhar sin in kan theih.
Salai Shalom hi 2022 March 15 ah amah hruainak in thongtla minung 50 leeng aa sawm hna i zaam an i timh ca ah atu bantuk in thah an ton hi a si tiah SAC misual hna cathanh chung ah aa tial. Kalay thonginn ah an thah mi hna hi Salai Shalom telh in PDF dang he minung 7 an si. Credit; The Hakha Post
2022 March 16 – Karen ram, Myawaddy ramri lam in Thailand ram chungah phungning loin ramri a lonh i mawṭaw chungah aa thupmi Myanmar rianṭuantu 53 cu Maesot khua chuah hnu Tak province, Bangkok a kainak lam ah March 14 zinglei ah tlaih an tong tiah theih a si.
Maesot khua chuah hnu Tak province chung Bangkok kainak lam cungah a ummi zohfelnak gate ah kawpi tom telh in thil hringno pawl an phorhnak mawṭaw pakhat cu Thai Social Supervision Board le palik pawl nih an check hna. Thil hringno pawl karlak ah aa thupmi Myanmar rianṭuantu pa (31) le nu (22) cu kan tlaih hna tiah Thai uknak nawl ngeitu pawl nih an thanh.
A tu bantuk khuacaan a linh tuk lioah thil hringno pawl phorhnak mawṭaw cungah aa thupmi Myanmar rianṭuantu pawl cu an thaw iap lakin harnak an tuar kha hmuh khawh a si tiah tlaih lioah aa telmi Thai rian ngeitu pakhat nih a chim. Maesot chuah hnu Tak province chungah a ummi Bangkok kainak lam zohfelnak gate ah a luancia zarhhnih lioah thil hringno phorhnak mawṭaw chungah aa thupmi Myanmar rianṭuantu 15 rak tlaih a si i zarhhnih chungah a voihnihnak 53 tlaih chap an si hi a si.
Tlaih a tongmi Myanmar rianṭuantu hna nih an puai-sa hna cu phorhnak man ah Thai baht 25,000 in 30,000 tiang an pek hna i an rat hi a si. Thailand ram chungah phungning MoU in rat khawh a ngah hlan ah a tu bantuk phungning loin ramri lonh in luh a si ruangah nikhat ah minung 100 leng tlaih an tong i a tu March thla chungah Thai-Myanmar ramri gate 6 hrawng in a rak lutmi Myanmar rianṭuantu 1,000 leng tlaih an si tiah theih a si. Ref: Karen Information Center, The Chinland Post
