Press "Enter" to skip to content

SAC Ralhrang Nih Hrangchin Lengmang In Cihmih An Kan Timh

Lunglawmhnak le Ngaihchiatnak Aa Cawh Ko Ee. CNA /CDF / CNDF / PDF – Zoland nih thawngṭha ankan phawrh. Lunglawmh nak Ni asi. Mindat Kan Unau hna bangin kan ral atha ve Tinak le Pale Bo Naga kan hluan ve Tinak asi. Lawmh loin um khawh asi lo. Ralhrang Rallokap 61 cu Munghingkha an dangh hna.

Rikhawdar Ralloakap camp zikpit tein an tuk. Uico 5 nih Munghingkha khim tein an ei buin mithi khua viza an hmuh. Tampi hliam an tuar rih. Falam le Hakha karlak ah Uirual an tap. Hakha an lanh khawh ti lo. Bo Naga bangin bomb hmang kan thiam cang. Mah tein bomb in pamh asi ti lo. Putoa ah Uirual tampi an thah hna.

KNU nih tam nawn an thah ve hna. Kerenni ah tampi an thah ve hna. Khat lei ah lunglawmhnak a si terlo tu thawngpang: CNA / CDF (3), CNDF 1 nih an kan liam tak. CNDF Chin paraltha pa hi minung tuah in an tuah lo. Ngawngphet le mit mu loin. Dokthek innlo an duah. India bawmhmi dungci in Rungtlang in an kan kah.

CDF – Hakha Ralkap an tlaih. India in cawkmi Hriamnam le Ralkap thilri, raltuknak thilril vialte Assam Rifle nih tlaih lengmang. Lung hi a tha hrim lo. Ngeihchun mi tein cawk ve mi asi cu mu. Dibezin ah PDF 11 cu saram bangin an thah hna. Chaungkhuah ah Chin nufa rual (3) an tlaihrem hna hnu ah ankan thah bet.

Hriamnam tlamtlinlo ruangah mino hna an liam kan hmuh ah mikip kha ngiar le ti chih kan duh tawn hna. Nain I soisel can silo, Pumkhat si can asi. I ngaihthiam can asi tiah lugcan kan I pe. Then khawh loin pumkhat si ko usih tiah kan I hnem. Nain Soisel siloin uhtanh nak cu chimphuan khawh asi ve ko lo maw kan ti tawn ve.

NuCi riantuannak zoh tik ah International lawng ah papek deuh asi. Ground level ah a herh mi bawmh le Hriamnam bawmh ah a chambau tuk rih mi ruat ah lung amit ko. Nunnak pekin Raldoh mi caah bawmhnak hi aum tluk asi. Nunnak pektu Ralkap hna le NuCi hi lamhla tuk ah um veve asi. Nainiam tein tuan ti khawh asi rih lo.

Ahmun um mino nih nunnak pek hna hlah sehlaw, NuCi hi Zawmelung ti dan in Thli Cozah le Lamhla cozah taktak asi cang hnga? NuCi um hlah sehlaw, AHmun um mino Ralkap vialte hi Muci tling in Ralkapbu pakhat kan si khawh deuh men lai ti zong ruah can aum pah.

Kannih nunnak kan pe, Annih cachuah le thanhca ah an iza. Ahmun ah ratin thazang peknak tal an tuah ballo tiah thachiah a fawi te cang. Mino cu kan ingpuan tuk tikah kan pamh len ko hna nain ahnu ah kan lung adai than. Ram caah nunnak pek kan I thimh than ko.

Aw zei ti awk tha, SAC nih le hrangchin lengmang in cihmih an kan timh. Hriamnam nih le pek ballo. Kan ngeihchun tein Mino Ralkap vialte fonh in tah kan tuk rih ko hna lai, kan ti than. Dawtnak le zawnruah nak he an kan hlut tu tlawmte sin in kan hmuh mi te in teh nunnak pek in kan doh rih ko lai kan ti.

Hi tluk can har lak ah an kan bawmhtu hna hi lawmh lo awk an tha lo kan ti tawn. 007 bangin hriamtling he ralteinak kong cu kan ruat ngam ve tilo. Hnu kirh awk kan tha tilo caah Kan Kedan lawng hi Kan Ralhruang asi kan ti cang ko. Kanmah cu kanmah lawng kan um caah NuCi, International le Ramdang cu kan bochan ngam ti hna lo.

Kanmah tein kan ngeih mi te in raltei hlan tiang nunnak le thisen pek in kan doh lai tiah biakamnak he kan si. PDF /CDF Ralkap tampi cu meithal ngeih lo lawngte, Vanlawng thawng theih poah ah mah le mah I zoh in kan mit arti tia asi mi lawng kan covo asi. NuCi zong cu Mino Ralkap hlut ding nakin Vawlei ki li athli nak ah a baa deuh cang.

Aho ka hlut lai ti hmanh theih cawk lo tiang in a tammi GZ mino Ralkap phu rual hna, kan tam tuk hrinhran. Nain NuCi zong hi acan ah an poi tuk tawn nak cu Major le Minor an then thiam tawn lo. Soisel silo. Uhtanh bia. Nuar bia. Hriamnam bawmh le PDF / CDF/ LDF pumkhat siter awk ah I zuam in hma lak hmasat loin,

Can Karlak Lakhruak Fimcawnnak a hei ti leh bang ah hin cun, sawk ko in ngalh afawi te. Rianpipa le hmasa le hmanung rian thleidan thiam lo ahcun a theih mi Mifimthiam hna hal awk asi ko. Asilo ah mifim thiam tampi kha NuCi member le kusale ah hmang ah apoi nak aum ve fawn lo. By_ Zingtincuai Cinzah

Be First to Comment

Leave a Reply

Your email address will not be published.