SAC Ralhrang Nih India Ram Ah Ralzaam Dirhmun In A Um Kir Dingin An Thanh
Chin ramkulh, Matupi peng, Yezua khua ah ralhrang le mipi vengtu ralkap karlak kahdohnak ruangah khua chuahtak in India ram ah a zaam mi khua pohpoh cu kir ṭhan i khuachung ah mah le inn cio hlam ṭhan ding in loud speaker in an au, tiah theih a si. A luancia January 23 ah Matupi in a rak ra i Zotung ram chung a rak lut mi ralhrang pawl cu CDF-Zotung nih an kah hna i ralhrang 3 an rak thi. CDF-Zotung in pakhat nih ram caah a nunnak a rak pek i pakhat hliamhma a rak pu, tiah theih a si.
“Yezua cu khua mi dihlak nawn nih kan zaamtak dih. Khuachung ah minung an um lo ti awk a si cang. Ralhrang hnuzul lawng an taang. Atu ah ralhrang pawl nih Loud speaker in khuachung hlam ṭhan ding in an kan auh. Hohmanh nih khua zaamtak cu kan duh lo. Yezua khua in nihnih ah phak khawh mi India ram ah kan zaam hna.
“Khua kan chuahtak lio zong ah innli a rak kaang cang. Hriamngan le meithal in an kah ruangah a rawk mi inn zong an um cang. A dang khuate zong ah cu bantuk in a si dih,” tiah ralzaam pakhat nih a chim. Yezua khua sakhan in khuachung le Yezua khua pawng ah a um mi Ruava, Sawti, Hrinthang khua pawl cu ralhrang nih hriamngan in an kah hna caah ralzaam minung 3,000 nak tlawm lo an um, tiah theih a si. Crd; The Chin Post
Sagaing ramṭhen, Monywa peng Tawpuh(တောပု) khua pyusawthi hna chung in tat-saith-hmu(တပ်စိတ်မှူး) pakhat Yin Nway Thein cu January 30, zaan suimilam 9:45 ah Bu Sa Nay hruai mi phu nih an kah i, an kahnak hmunhma ah a thi colh, tiah theih a si. Thah a tong mi Yin Nway Thein cu pangpar zuar in pawcawmnak rianṭuan mi a si, pyusawthi phu chung in tat-saith-hmu(တပ်စိပ်မှူး) a si caah fimhlawmnak kan tuah hi a si, tiah Bu Sanay phu nih cathanh an chuah.
Magway ramṭhen, Yesagyo (ရေစကြို) peng Zikungkyun(ဇီးကုန်းကျွန်း) khua um mi pyusawthi phu chungtel Aung Tawng le a fapa Myint Moe cu January 28, ah an umnak innchung ah luhhnawh in mi zei an si ti hngalh lo mi hriamtlai phu nih an kah hna caah cuka hmun ah cun an thi colh, tiah khuachung mipi nih an chim.
Sagaing ramṭhen, Kata peng post office ah nihin January 31, zinglei suimilam 10:00 hrawng ah puahkehnak a chuak i, cu thilcang kong ah a thi mi le hliamhma tuar an um le um lo fianghlang in theih a si rih lo, tiah khua mi nih an chim. Khit Thit Media
Credit: The Chin Post
