SAC ralhrang nih Mi 35 Helicopter 2 in an kah hnu ah

Sagaing ramṭhen, Yinmapin pengkulh, Tapyiaye khua cu nihin February 28 chun ah SAC ralhrang nih Mi 35 Helicopter 2 in an kah hnu ah helicopter dang pahnih nih SAC ralhrang 60 hrawng a van ṭhumh hna i phungki inn telh in khuachung inn zong an duah hna, tiah theih a si. “Inn zeizat a kangh cu hngalh a si rih lo,

Tapyiaye khua hi inn 230 hrawng an si i khuami pakhat kuan nih a khen i hliam tuar ti cu kan theih nain befiang si le si lo kan fianh kho rih lo,” tiah khua mi pakhat nih Yangon Khit Thie Media ah a chim. Tapyiaye khua lawng si loin a kiangkap khua- Kyauhpyuh, Moe Kaung, Ophoe khua hna zong a himnak hmun ah an zaam hna, tiah theih a si. Credit; The Chin Post

CDF- Mindat nih Mindat khuachung ah zuu le beer zuar an khap a zuarmi poh cu a herh ning in sualphawt le dantat an si lai, tiah theih a si. Chin ramkulh, Mindat peng chung ah zuu siseh ,beer siseh nan zuar hrimhrim lai lo, Hi biakhiahnak hi ‘Avoi 4nak CDF-Mindat Central Committee Meeting’ nih biakhiahmi a si,

Cucaah nawl ngai loin a zuarthlai mi hna cu faak pi in dantat nan si lai” tiah nizaan february 27 zaanlei ah CDF- Mindat nih an Facebook cahmai ah an ṭial. Cucaah Zuu le beer zuarthlai kong ah thawngthanhnak dang kan chuah hlan lo poh cu tutan kan thanhmi hi fehter peng a si, tiah an ṭial chih. Covid-19 In Myanmar Minung 19,365 An Thi Cang!:

Nizaan February 27 ah Covid zawtnak in minung 5 an thih chap caah Myanmar ram chung ah Covid-19 in a thi mi dihlak 19,365 an si cang, tiah SAC ngandamnak zung nih nihin February 28 ah a thanh. Febuary 26 zaan sml 8:00 in 27 zaan sml 8:00 (suimilam 24) chung ah zawtnak aa chonhmi minung 1959 an si, Ram pumpi covid aa chonhmi 586,000 leng an si cang tiah theih a si.

Febuary 25-26 cheknak ah zawtnak hrik tambik an hmuhnak hmun cu Shan ramkulh a si i minung 345 an si, tiah SAC ngandamnak zung nih a thanh. A pahnihnak ah Mandalay ramṭhen si i minung 299 le a pathumnak ah Yangon ramṭhen 256 an si i Yangon ramṭhen cu a tambik a si zungzal nain pathumnak ah a tla. SAC ralhrang nih uknak an laak hnu in zawtnak chonh mi cazin ṭha tein laak khawh a si lo caah SAC ngandamnak zung nih a thanh mi nak in an tam lai, tiah mibawmchantu phu nih an chim. Credit; The Chin Post