SAC Ralhrang Nih PDF Nan Si Tiin Khua Minung 6 Bak An Thah Hna Ee!

Shan ramkulh, Ywangan(ရွာငံ) peng Pe Yin Taung(ပဲရင်းတောင်) khua mi 6 cu ‘PDF nan si’ tiin SAC ralkap nih nihin April 22 ah an thah hna, tiah Ywangan People Defense Force (YPDF) nih fehternak he thawng an thanh. Khua mi an tlaih mi hna cu PDF an si ti in Pe Yin Taung khua nitlak lei meng 2 a hlatnak ah SAC ralkap nih an kalpi hna i,

an duh tawk in an hrem hna hnu ah an thah hna. Meithal he tlaih mi bantuk in hman zong an thlak hna, tiah tualchung mi nih an chim. Thah a tong mi hna cu:- 1. Ko Tin Phe(ကိုတင်ဖေ), 2. Ko Hla Soe(ကိုလှစိုး), 3. Ko Thun U(ကိုထွန်းဉီး), 4. Maung Tat Aung(မောင်သက်အောင်), 5. Ko Myo Thwe(ကိုမျိုးထွေး), 6. Ko Win Naing(ကိုဝင်းနိုင်) hna an si, tiah theih a si.

Cunbantuk ṭhiam in Tanhse (တည့်ဆည်) peng Greik(ဂရိတ်) khua sianginn le phungki sianginn cu nizaan April 21 ah khan SAC vanlawng nih a kah i an rawk. SAC nih vanlawng in ralkap thazaang 100 fai an thlah hna i civil mi 6 zong an tlaih hna, tiah theih a si. Yaw Peng Ah Ralzaam 10,000 Leng An Um Cang, Eidin Tirawl Le Sii-ai An Herh!: Magwe ramṭhen,

Yaw peng ah SAC ralkap nih mithah lainawnnak an tuah ruang le civil mi an tlaih hna ruang ah siseh, mipi in inn an khanghpiak hna ruang ah ramlak ah ral a zaam mi minung 10,000 leng an um, tiah Yaw Region Committee for Internally Desplaced People (YRCIDP) nih a thanh. SAC ralkap nih inn an khangh mi hi inn 500 hrawng an si, tiah YRCIDP nih a langhter. Yaw region ralzaam hna hi emergency in bawmh an herh i, YRCIDP facebook page in bawmnak peh khawh a si, tiah Yaw Defense Force(YDF) nih an thanh. Credit; The Chin Post

Relchap; Sagaing ramṭhen, Yinmarpin peng ah April 21 chun Sml 2:00 hrawng ah SAC ralkap le PDF phufonh hna hmaitonh in kahdohnak a chuak, tiah khua mi hna nih a chim. Yinmarpin peng Sone Yua( ဆုံရွာ) khua in Min Mah Kone khua lei ah a kal mi SAC ralkap 100 hrawng cu Min Ma Kone (မင်းမကုန်း) khua le Kyo Kyua Win (ကြိုးကြာဝင်း) karlak ah PDF phufonh nih an kah hna i, kaphnih kahdohnak a chuak.

Kaphnih kahdohnak cu minute 20 hrawng a rau i SAC ralkap lei in a thi mi le a hliam mi kong fiang in theih a si rih lo. PDF phufonh lei in ralkap 1 a nunnak a liam, tiah PDF ralkap Bo Tu Ring nih a chim. Unity Fighter PDF kum 30 hrawng a si mi ralkap San Myint Htee cu a ban ah kuan nih a khen i a thi tamtuk a chuah caah a nunnak a liam, tiah a chim.

Cu nunnak a petu ralkap nih cun khuachung in mipi hna an chuah khawh nak ding caah SAC ralkap hna cu a kham hna lio ah kah a ton hi a si, tiah a chim chap. Atu zong ah SAC ralkap hna cu Kyo Kyua Win ( ကြိုးကြာဝန်း) khua phungki sianginn chung ah umhmun an khuar, tiah theih a si. Myitkyina Palana Khua Um SAC Ralkap Cu KIA Le PDF Phufonh Nih An Kah Hna: Kachin ramkulh,

Myitkyina khuapi, Nuang Naan khuakomh, Palana khua chung ah umhmun a khuar mi SAC ralkap hna cu April 21 zaan Sml 7:45 hrawng ah KIA le PDF phufonh nih an kah hna i, kaphnih kahdohnak faak ngai a chuak, tiah theih a si. Palana khua um No.3 SAC ralkap sakhan cu KIA Brigade 2, Battalion 11 le KPDF phufonh hna nih luhhnawh in an kah hna i, SAC ralkap a thi mi le hliamtuar an tam.

SAC ralkap a thi mi hna ruak le hliamtuar mi hna cu SAC ralkap siizung mawṭaw 3 in an thiar hna, tiah KIA thawngthanhnak nih a thanh. Palana (ပလန) khua gate sakhan kah a si hnu ah SAC ralkap dang an phan ṭhan i, khua chung ah cu hlathlainak an tuah, tiah theih a si. Cu kahdohnak chung ah kaphnih a thi mi cazin cu fiang in theih a si rih lo.