SAC Ralhrang Nih Ralzaam Minung 11 Cu Mei In An Khangh Hna
Sagaing ramṭhen Yinmapin(ယင်းမာပင်) peng, Latpandaw (လက်ပံတော) khua mi ralzaam minung 11 cu SAC ralkap nih meikhangh in an nunnak an laak hna, tiah khua mi nih an chim. Nizaan March 8, zinglei suimilam 11:00 luan hrawng ah SAC ralkap minung thazaang 180 hrawng nih Latpandaw(လက်ပံတော) khua lei cu hriamngan in an kah hnu ah khuachung ah an lut, tiah khua mi pakhat nih a chim.
“Hriamngan kahnak in a nunnak a liam mi zong an um, tlaihkhih a tong mi hna cu an thah beh fawn hna. Cheukhat cu atu tiang an thawng theih loin a tlau mi zong an um,” tiah khua mi pakhat nih Than Lwin Khet ah a chim.
SAC ralkap phu hna cu nihin March 9, zinglei Latpandaw (လက်ပံတော) khua in an chuah hnu ah, khuachung mi meikhangh in SAC ralkap nih an rak thah mi hna ruak cu khua mi nih an hmuh hna. Khuachung minung 10 cu inn pakhat chung ah an pumh hna i, mei in an khangh hna. Khuachung minung umnak inn 2 zonh an khanghpiak hna, tiah theih a si.
Nu pakhat ruak zong phung-ki sianginn hmunhma chung ah an hlonh, tiah Yinmapin (ယင်းမာပင်) peng thawngzamhnak pakhat nih a langhter. Hriamngan hliamhnak in hliamhma tuar minung 12 chung ah pakhat lawng hmuh a si i, a dang minung 11 le khuachung pa 3 cu an tlau, tiah khua mi pakhat nih a chim. Phung-ki sianginn hmunhma chung ah nunnak a liammi tar nu pakhat cu LPDF le Hero Tiger phufonh nih a ruak an vui, tiah theih a si. Credit: The Chin Post
SAC nih nawlngeihnak an laak hnu ah ralzaam dirhmun a phan mi minung sing 5 leng an si cang, tiah UNOCHA nih nihin March 9 ah cathanh an chuah. Ralzaam dirhmun in a um mi dihlak hi minung 502,600 an si i, SAC ralkap hna nih nawlngeihnak an laak ehlan i umnak hmun a kaltak mi(ralzaam) hna he cun an dihlak fonh ah minung 873,000 an si cang, tiah an cathanh ah cun an langhter.
February 2022 thok in Shan ramkulh, thlanglei Hoepan(ဟိုပန်), Gyautkhine(ကွတ်ခိုင်), Lashi le Musae, Shan ramkulh chaklei Yatsauth(ရပ်စောက်), Laechia(လဲချား), Loilin(လွိုင်လင်) le Mauthmae(မောက်မယ်) peng hna ah SAC ralkap hna le tlangcung hriamtlai hna kar kahdohnak a chuah caah, February 1, 2022 in pengkulh 7 ah minung 2,126 nih an umnak hmun cu an kaltak.
February thlachung ah pengkulh 6 in kahdohnak a chuah ruangah ralzaam dirhmun a phanmi minung 2,474 hna cu Shan ramkulh chung an umnak hmun ah an kir kho ṭhan cang, tiah UNOCHA nih an chim. February 28 UNHCR nih cathanh a chuah ning ah pengkulh 11 in minung 56,400 cu 2021 kum hramthawk in an umnak hmun a zaamtak mi an si i, cu chung ah cun minung 14,320 cu pengkulh 11 i caan karlak sakhan ah an i dor hna, tiah an langhter. Credit: The Chin Post
