SAC Ralhrang Nih Russia Lei Tangin Bia A Chim Ve Than
Russia nih Ukraine a tukmi kong ah Myanmar ram uknak latu SAC Ralhrang nihcun Russia leiṭang in bia a chim hoi ṭhan. SAC ralhrang in biachimnak nawl ngeitu Zaw Min Htun cu Russia le Ukraine kong ah VOA nih bia an hal i pakhatnak ah “Russia nih amah uknak fehternak caah a tuahmi a si tiah ka hmuh; A pahnihnak ahcun Russia nih vawleicung ramkip daihnak le cuaithlainak ah ram lianngan a sinak a langhter” tiah a chim.
Vawleicung ramkip nih Russia an mawhchiat lio ah SAC ralhrang nihcun Russia nih a tuah dingmi rian a tuah a si ko,” tiah a dirkamh. SAC ralhrang le Russia cu a fekmi pehtlaihnak a ngeimi an si i Min Aung Hlaing zong kan hnu kum June thla ah Russia a tlawng i Doctor degree an rak pek bal cang. Min Aung Hlaing nih uknak a laak zong ah Russia nih a dirpi pin ah hriamnam zong a zuarh peng, tiah theih a si. Credit: The Chin Post
Ukraine ram khuapi ngan cheukhat cu Russia ralkap nih rocket in kah hram an thok hnu ah Russia ralkap hna cu Ukraine ram thlanglei rili kam ah an i dil ṭhup ko, tiah tualchung media hna nih an langhter i, “Operations in Eastern” tiah auhmi raltuknak Putin nih a thok cang tiah tlang an taar. Putin nih Ukraine kap ding in TV ah a thanh tlawmpal ah Ukraine khualipi Kyiv cu khuadei hlan in puahkeh thawng in a khat colh,
Kyiv khuachung i a biapi bik mi Airport pawng ah meithal puah thawng a van thang i cu khawh cun Emergency bell tum thawng nih a zulh colh, tiah Interfax thawngzamh nih a langhter. “Putin nih Ukraine cu a luhhnawh taktak ko cang, a dai tuk mi Ukraine khuapi pawl hna cu puahkeh thawng nih a chilh dih cang,” tiah Ukraine Foreign minister Kuleba nih a Twitter ah a ṭial.
“Kannih cu timhtuahnak (plan) pahnih kan ngei- Pakhatnak cu Palai he ceihhmainak a si i cuti a tlamtlin lo ahcun kan ram, kan vawlei le kan khuapi, kan khuate hna runvennak ah kan thazaang dihlak in kan tei hlan lo kan doh lai,” tiah February 22 ah khan Ukraine Foreign minister Kuleba nihcun a rak chim.
Ukraine khuapi cheukhat Rocket in kah an ton lawng si loin Foreign Ministry Website tel in Ukraine Cozah nih a ngeihmi a biapi deuhmi Website cheukhat zong Cyber Attack an tong. Ukraine President Zelensky nih Ukraine ram pumpi ah Emergency a thanh i kan ram humhimnak le kilven dingah ready kan si ko, tiah a chim. The Chin Post
