Press "Enter" to skip to content

SAC Ralhrang Nih Saikaung Khua Luh Hnawh In An Khangh Caah Mipi Hriamtlai Nih An Kah Ve Hna, Kap Hnih Kahdohnak A Fak

Myaing peng Saikaung khua ralhraang nih luh hnawh in an khangh ca ah PDF nih an kah hna, April 28, 2022. Magwe ramthen, Myaing peng, Saikaung khua cu council ralhraang le Pyo Saw Htee pawl nih April 28 zing suimilaam 11:00 hrawng ah an luhhnawh hna i khuami inn le zuatkhalhnak inn pawl an hrawh tiah tualchung mi nih Khit Thit Media ah an chim.

“Ar zutnak inn zong an khaangh. Ti khonnak hmanh an ngan lo an thluk dih tiah kan theih. Ralhraang hi 70 hrawng an si tiah kan theih” tiah tualchung mi pakhat nih a chim. Council ralhraang pawl cu PDF nih an rak kah hna i kaphnih kar kahdohnak a chuak tiah tualchung mi sin in kan theih.

“Hriamngan le hriamhme he an i kap. PDF an rak phanh in kahdohnak a fak tiah kan theih. Atu cu a dai cang” tiah tualchung mi nih Khit Thit Media ah chim. Atu lio cu khuami himnak ah an i dor chung a si caah mei a mit cang ko nain a rawk mi pawl cu kan hngal kho rih lo. Source: Khit Thit Media

Relchap; Russia nih Yamal minthutnak phunglam in Poland sin ah gas a pek tawn mi cu nizan April 27 khan a donghter cang, tiah European Union Network of Gas Transmission operator data nih a langhter. Ukraine cung i a cawlcanghnak ruangah nithlaklei ram hna he i theihthiam lonak an ngeih mi cu a karh deuh lai, tiah zumh a si.

Poland bantuk ṭhiam in EU le NATO member a si mi Bulgaria zong Russia nih Gas ka phihkhar lai, tiah a thanh rih. Ukraine nih cun Russia cu Europe ram hna he rianṭuanṭinak a hrawktu ah a puh i, Europe ram cu Gas le Oil phihkharnak in hrem timh ah a puh. President Zelenskyy nih cun, “Russia nih an i timh bik mi cu Ukraine ram laak lawng siloin Europe ram hna le nichuahlei ram hna laak a si i, democracy uknak hrawh dih zong aa timh bik mi a si,” tiah a chim.

Poland le Russia cu gas kongkau ah hnatlaknak an rak tuah i, kumkhat ah cubic meter 10.2 billion Poland sinah supply ding in minthutnak an rak ngei. Russia in a cawk mi gas hi Poland nih a herh mi 50% a si. Roland tang i gas lei tlaitu PGNiG nih cun Russia nih Belarus le Ukraine ramchung in gas a pek tawn mi cu nizan zing suimilam 8 hrawng ah khan an phih cang, tiah an thanh.

Sinain Poland nih cun gas khon cia mi tampi an ngei rih i, gas khawmnak(storage) ah 76% hrawng a um rih, tiah an thanh. Russia president Vladimir Putin nih cun, Russia sin i gas a cawtu hna nih Russia phaisa Rouble lawng in cawk khawh a si lai, tiah a rak thanh. Cu phungphai cu ram tlawmpalte lawng nih an zulh khawh, tiah theih a si. Crd; The Chin Post

Be First to Comment

Leave a Reply

Your email address will not be published.