SAC Ralhrang Sakhan Mipi Vengtu Ralkap Nih An Laak, Ralhrang Thi An Tam Taktak
Sagaing ramṭhen, ChawngOo peng, Gangyikung (ကံကြီးကုန်း) khua ah umhmun khuar mi SAC ralkap le pyusawthi hna sakhan cu mizapi vengtu ralkap phufonh nih luhhnawh in an kahdoh hna caah SAC ralkap minung 12 nak tlawm lo an thi, tiah mizapi vengtu ralkap ZERO phu nih cathanh an chuah.
Nihin March 9, chun suimilam 1:00 hrawng ah Gangyikung (ကံကြီးကုန်း) khua ah umhmun khuarmi SAC ralkap phu minung thazaang 60 hrawng umnak sakhan cu mizapi vengtu ralkap ZERO-Myinchain, MRA (Myaung Revolution Army) le MGN 35 phufonh hna nih an doh hna. Kaphnih kahdohnak cu suimilam 3 hrawng an rau i,
SAC ralkap lei in anmah bawmtu ding tampi an phak hnu ah mizapi vengtu ralkap phufonh cu hnu an tolh ṭhan, tiah theih a si. Kahdohnak a chuah hnu ah SAC ralkap hna nih Gangyikung (ကံကြီးကုန်း) khua cu an khangh, tiah theih a si. Sagaing ramṭhen chung ah SAC ralkap hna nih internet line an phih hnu ah minung thazaang le hriam thazaang tampi chap in kahdohnak an tuah, tiah theih a si. Credit: The Chin Post
Nikhat chungah Covid-19 mizaw 1,400 hmuh a si, kawlram pumpi in covid-19 mizaw sing 6 leng an um, The Chinland Post | 2022 March 9 – Myanmar ram chungah covid-19 mizaw 1,400 leng nikhat chungah hmuh a si caah kawlram pumpi in covid-19 zawtnak rungrul a ngeimi 600,000 leng hmuh a si tiah SAC tangah a ummi Ministry of Health nih March 8 ah a thanh.
A luancia zarh chungah, covid-19 mizaw a zaa lawng hmuh a si nain zarh thum a rauh hnu ah a sing leng in an i chap hi a si. March 7 ah covid-19 mizaw thar 1,100 leng hmuh a si mi chung in Yangon ramṭhen, Shan ram le Magway ramṭhen hna ah ah covid-19 i chawnhnak a karh bik le a tam bik an si.
Mah cazin lak khawhmi hi CDMers pawl nih on mi sizung pawl le laboratory ah zohfel mi telh loin, ralkap nih on mi sizung pawl ah zohfel mi a si caah a fiangmi cazin theih khawh a si rih lo. Ministry of Health nih a thanhning ahcun, a luancia sml 24 chungah laboratory in 1,729 check a si i covid-19 zawtnak rungrul a ngeimi 1,401 hmuh a si caah zawtnak rungrul hmuhmi hi 6.96% a si.
Zawtnak in a dam cang i sizung in a ṭum kho cangmi minung 1,729 an si tiah a cathanh ah a langhter. Cun lawng si loin, covid-19 zawtnak in a thimi minung 3 an i chap caah March 8 tiangah covid-19 in a thimi minung 19,394 an si tiah theih a si. Tulio caan ah, Myanmar rampi in omicron zawtnak rungrul a ngeimi 350 deng an phan cang tiah SAC tang ah a ummi Ministry of Health nih a langhter.
