Rakhine Ah Palik Chungkhar Raltuk An Cawnter Hna. Rakhine ramkulh, pengkulh cheukhat ah palik chungkhar le palik nupi pawl cu SAC ralkap nih raltuk an cawnter hna tiah palik he naihniam in ummi hna nih an chim.
Rakhine ramkulh Maungdaw le Maypone peng ah palik chungkhar cu raltuk an cawnter hna, Pengkulh dang ah ummi palik chungkhar hna zong raltuk ning cang an cawnter hna lai tiah theih asi.
” Meithal kah an chimh hna, sakhan luhhnawh tontik ah a i khamnak an chimh hna,raltuk taktak ding bantuk in an cawnter hna, zarhkhat chung raltuk cu cawn a si i, naite kha an dih,” tiah Maungdaw peng palik naihniam pakhat nih a chim.
SAC nih tu bantuk in palik chungkhar le palik nupi hna raltuk an cawnter hna hi, an kuttang minung SAC ralkap le palik thazaang an zortuk caah tubantuk in an tuah hi a si tiah Delta News Agency nih a langhter.
2020 kum lio, kahdohnak a rak daih lio ah Maungdaw peng palik nupi hna cu SAC nih ralkap training an rak pek bal cang hna. Crd; The Chin Post
Relchap; KIA le Shanni Nationalities Army(SNA) Kar Kahdohnak A Chuak. Kachin ramkulh le Sagaing ramthen ramri , Hpakant peng Seyin khua pawng ah nizaan january 26 zinglei slm 4:00 hrawng ah Kachin Independence Army( KIA) nih Sagaing ramthen lei ral ah a um mi Shanni Nationalities Army(SNA) check- gate an kah i an khangh tiah theih asi.
Seyin khuami pakhat nihcun ”zinglei sml 4:00 hrawng ah kah an i thok hi a si i,suimilam pakhat chung hrawng an i kah hnu ah KIA nih SNA check gate cu an khangh, an i kahnak check gate hi kan khua he ai naih te, tiva lawng nih an kan dan, Check gate hi Sagaing ramțhen chung ah a um mi asi” tiah a chim.
Kahdohnak ah kaphnih thi le hliam kong hngalh a si rih lo i Kahdohnak pehzulh in a chuak khomi a si caah khuami cheukhat hna cu khualeng ah ai dormi zong an um tiah a chim chap.
Nikum, 2022 july le August thla lio zong ah Seyin khua ah KIA,PDF tangți le SNA,SAC țangți kar kahdohnak faktuk a rak chuak i khuachung ah vanlawng in bomb an rak thlak caah khuami thi le hliamtuar an rak um i khuapi ning in ral an rak hrial. TCP
SAC Union Election Commission Nih Ramkhel Party Upadi Thar Chuah. Min Aung Hlaing nih 2023 ah rampi thimnak ka tuah lai tiah a chim hnu in SAC kuttang Union Election Commission(UEC) nih Ramkhel Party upadi thar an ser tiah theih a si.
Upadi thar an sermi ah, Party thar dirh a duhmi hna nih Myanmar Economic Bank ah kyats sing 1,000 an ap lai i, Party an dirh ni in thla thum chungah Party chungtel sing 1 an ngeih a hau, tiah an langhter.
SAC nih a cohlan lomi bu le thong a tlami hna nih Party an dirh kho lo. Party a ngei cangmi hna zong nih upadi thar kan ser ni thawk in thlahnih chungah register an tuah lai i, register a tuah lomi Party paoh hrawh an si lai, tiah UEC nih cun an langhter.
Aung San Suh Kyi nih a hruaimi NDL Party zong hrawh ding dirhmun a phan. A ruang cu NLD luttlai hna thong an tlak caah a si. SAC nih an rak tlaihmi NLD lutlai cheukhat cu an thlah ṭhan hna nain Aung San Suh Kyi nih cun NLD lutlai hna he i ton hnuah kan Party dirhmun kan chim te lai, tiah a chim ve.
Be First to Comment