SAC Ralkap An Lungdong Cuahmah Cang, Mipi Nih Thazaang An Kan Pek Lo Ti An I Theih Caah Chuahnak Lam An Kawl Cio Cang

SAC Vice Chairman Soe Win nih, “Atu lio hi kan ralkap pawl ṭhenthek an tong cuahmah,” tiah Nizaan March 18, Shan ramkulh Palaw hmun SAC ralkap meeting ah a chim. “Tulio ah hin ramchung ramleng i fonh in ramkhel le chawlehnak phihkhar in, a lamkip in dohthlennak thi an rawnh hna i,

Kan rianṭuannak hma a kal khawh lo nakhnga CDM tuahter; Bank system a tlakchiat nakhnga le phaisa a vaivuanh nakhnga pinah a zeiti poh in tlakchiatnak lam kan phanh nakhnga a lam kipin an i zuam,” tiah Soe Win nih cun a chim. “Cun, kan ralkap aa ṭhencheu nakhnga CDM tuahtu ralbawl le ralkap hlun pawl nih media hmang in bia an kan serh i, raltuknak zong in a kenkip in an kan ṭhihphaih, an kan hrocer,” tiah a chim fawn.

SAC ralkap thawnghram a hngaltu cheukhat nih an chimning ah cun SAC ralkap pawl hi mipi nih thazaang an pek ti hna lo ruangah an lung a der i, an i ruahchannak a dih pinah ralram ah a thi mi an tam tuk ca zong ah chuah a duhmi an tam kho tuk, pehtlaihnak an theih lo caah zaamnak an i harh i si, tiah theih a si. Credit; The Chin Post

Nizaan March 18 ah Kalay peng, Hmandaw khuapawng ah SAC ralkap le Mipi ralkap an i kahnak ah CDF KKG in ralkap pakhat a nunnak liam, tiah theih a si. Nizaan March 18 , Kalay thlanglei Cianta khua ah umhmun khuar mi SAC ralkap pawl cu Hmandaw khua lei ah rallam sial in an rat lio ah CDF-KKG Battalion -4 , PDF – Kalay, RKDF le PDF ralkap phu fonh hna nih Hmandaw khua pawng kan kah hna.

Kaphnih kahdohnak cu zaanlei sml 3:00 in 4:40 tiang suimilam 1:30 chung kan i kap i, kaphnih in hriamngan le hriamhme he kan hman, Kahdohnak ah kan ralkap pakhat nih ram le miphun caah a nunnak a pek, Pakhat nih hliamhma faak tuk lo a tuar, SAC ralkap lei in thi le hliam tuar kong theih a si rih lo, tiah Chinland Defense Force Kalay Kabaw Gangaw( CDF- KKG) nih a thanh.

Myanmar Ram Pumpi In March 18, 2022 Nikhat Chung Ah SAC Ralkap 25 An Thi: Myanmar ram pumpi in dohthlennak tuah hnu March 18, 2022 nikhat chung kahdohnak ah SAC ralkap 25 an thi, tiah Yangon Khit Thit nih a thanh. Cazin ning ah ralkap a thi mi hi Taningtari ramthen Myait ah 3, Karen ramkulh Demoso ah 10, KNU bridage 5 ah 1, Karen ramkulh Payatungsu (ဘုရားသုံးဆူ) ah 3, Magwe ramṭhen, Myaing ah 2, Shwe Bo ah 4, Mandalay ramṭhen Nuahtogyi ah 2, an dihlak 25 an si. KNU bridage 5 ah 1, Magwe ramthen Yesagyo ah 1; ti in minung 2 nih CDM an tuah. The Chin Post

Sagaing ramṭhen, Kalay pengchung Natchaung (နတ်ချောင်း) khua cu SAC ralkap nih hriamngan he an kah leng ah khuachung inn hna cu an khangh caah khua mi minung 10,000 leng cu a himnak hmun ah an zaam i atu hi emergency in bawmhchanh an herh, tiah theih a si. Kalaymyo he meng 15 tluk aa hlatnak ah a ummi Natchaung(နတ်ချောင်း) khua cu inn 2000 leng a umnak khua pakhat a si i, SAC ralkap nih March 15 ah hriamngan he an kah lengah khuachung inn le innzuat saṭil hna cu an khangh hna, tiah cuka khua um mi Mawng Gan Kawng nih a chim.

A chim ning ah cun, “March 15 ah kan khua lei ah rallam sial in an ra i, a hlatnak in kahmi hriamngan he kan khuachung cu an kan kah, PDF zong nih khuachung an luhkhawh lo nak ding ah bomb an puahhnawh hna. SAC ralkap nih hriamngan tamtuk an hman caah PDF cu hnu an tolh, cu lecangka in khuachung cu an khangh i, inn 100 leng a kangh lengah innzuat saṭil hna zong mei nih a kangh chih hna,” tiah a chim.

SAC ralkap nih atu bantuk in Natchaung (နတ်ချောင်း) khuachung inn an khangh caah cuka pawnghrawng um mi khua mipi hna zong a himnak hmun ah an zaam hna caah eiding le sii-ai emergency in bawmhchanh kan herh ko, tiah khua mi nih an chim. Cheukhat khua mi hna cu SAC ralkap an kir March 18 ah khuachung ah cun an kir hna i, an umnak inn hna cu an kangh/an rawh dih lengah, an innzuat saṭil hna zong mei hma in an thih cu hmuh a si, tiah khua mi nih cun an chim.