SAC Ralkap Helicopter Cu KNU Nih An Kah Thlak
KNU brigade- 5 hmunhma Phapun pengkomh Dowiloe(ဒွယ်လိုး) peng Mewai(မဲဝိုင်) khuakomh March 25 chunhnu suimilam 2:00 hrawngah SAC ralkap helicopter pakhat cu kahpiak an tong tiah KNU nih cathanh an chuah. Brigade -5 hmunhma chungah SAC ralkap hna nih vanlawng 3 he a voi 2nak ngiatthlainak tuah an zuan lio ah KNLA battalion 102 nih an kah i an khen ko nain tlak tak cu a tla lo, a kir hnu air force headquarter a phak ah an seh cu a rawk tiah military headquarters he neihniam in ummi hna nih an chim.
Zaanlei suimilam 4:00 hrawngah a voi 3nak ah vanlawng pakhat nih ngiatthlainak an tuah than tiah theih a si. A luancia March 23 zinglei ah Phapun pengkomh chungah ramri lonh in hmunhma khuar a timtu SAC ralkap hna cu KNLA nih voi 3 tiang an kah hna, cu kahdohnak ah cun SAC ralkap lei in minung pakhat a thi i minung pakhat nih hliamhma a tuar.
Cun March 24 brigade 5 hmunhma ah umhmun khuarmi SAC ralkap hna cu KNLA nih voi 5 tiang an kahd hna i a thimi le hliamtuar Kong ah fianghlang in theih a si rih lo. Cu kahdohnak ahcun SAC ralkap hna nih hriamngan le hriamhme hmang in khuachung lei an kah tiah KNU nih an cathanh ah an langhter chih. Credit; The Chin Post
China le Myanmar fonh in Covid khamhnak sii an chuah. The Chinland Post | 2022 March 26 – China cozah le SAC fonh in Covid khamhnak sii kan chuah cang tiah China Embassy nih March 23 ah thawng a thanh. China khamnhak sii chuahnak company nganpi a simi Sinopharm nih Myanmar Minister of Industry he i fonh in chuah a si lai tiah a thanh.
Southeast Asia ah Sinophram hi a voikhatnak bik Covid khamhnak sii chuahnak industry a si i, mah Covid khamhnak sii cu Myancopharm tiah minpek a si lai.
Myanmar ram ah Covid khamhnak sii chuahkhawh a simi hi ram hnih karlak i Covid zawtnak hrawhkhawhnak caah rianṭuanṭinak i a ṭhami a phichuak a si tiah Chinese Ambassador to Myanmar Mr Chen Hai nih a thanhnak ah a chim.
Thlanglei Myanmar caah Chinese Yuan 10.5 million man a simi Covid hrawhnak thilri pawl cu China cozah lei nih a bawmh i, Covid khamhnak sii chunhnak siṭhim 3 million zong a hlut lai tiah a chim.
