Press "Enter" to skip to content

SAC Ralkap Inn A Khangh Tawntu Kahdoh An Ton, Minung 37 Hrawng Thi Le Hliamtuar An Si

Kachin ramkulh,, Shweku (ရွှေကူ) pengkomh MinKyawngKung (မင်းကျောင်းကုန်း) khua ah rallam a sialmi SAC ralkap pawl cu, Kachin mizapi hriamtlai nih April 22 zan sml 7:30 hrawngah an bawh hna i an kah hna. A thimi an tampi lai tiah Kachin People Defense Force -KPDF nih thawng an thanh. SAC ralkap cu 40 hrawng an si lai, Bamaw(ဗန်းမော်) pengkomh

Chaungwa(ချောင်းဝ) khua leiah an ra i lam tanttim in Bo- Moe Kyu (ဗိုလ်မိုးကြိုး) hruaimi KPDF Company 1 nih RPG, 79mm bomb in an kah hna i, rallam an sialnak kam ah a tla. Cu kahdohnak cu minutes 15 hrawng a rau i KPDF leiin hliamhma pumi an um lo, tiah kan theih. Sagaing ramṭhen, Nguangpinsi(ညောင်ပင်ရှည်) khua ah mizapi thilri a fir piaktu SAC ralkap pawl cu, April 22 zing sml 10:30 hrawngah tualchung hriamtlai nih an kah hna caah SAC ralkap le Pyusawtee 30 hrawng an thi i, 7 hrawng hliamhma an pu tiah Zero bu nih thawngthanhnak an tuah.

SAC ralkap leiin 8 hrawng lawng an taan cang lioah i khamhnak mawṭaw(Armour) le ralkap tampi an ra tiah thawng kan theih. Nguanghla khua a khangtu SAC ralkap pawl cu Zero phu, Sangaing ramṭhen fonhkomh phu, Minmoe(မြင်းမူ) phu fonh, Ayartaw(အရာတော်) phu fonh hna nih an kah hna i Zero phu in 1 a thi i, 5 nih hliamhma an tuar, tiah thawng kan theih. Credit: The Chin Post

Sagaing ramtṭhen ,Yinmapin(ယင်းမာပင်)pengkomh,Pale peng Minmahanauh(မင်းမအနောက်) khua SAC ralkap nih an khangh i inn 120 leng a ciam pin ah khuami pahnih zong an thah hna, tiah tualchung mi siin kan theih. Yinmapin pengkomh , Pale peng Minmahanauh tiah auhmi Tiṭin(သီတင်း) khua cu a luancia April 18 ah SAC ralkap 120 hrawng an lut i,

mizapi umnak inn 120 leng an khangh lawng si loin khuami pa pakhat zong a cuar an hlih i an thah, tiah tualchung mi hna nih an chim. April 22 zing sml 10:00 hrawng ah Yinmapin peng Minmahkung(မင်းမကုန်း​) khua ah sualnak ngei lomi pakhat an kah thah, tiah tualchung ummi hna nih an chim.

Atu hi SAC ralkap pawl cu Kyukyawin(ကြိုးကြာဝင်း) Phungki Sianginn chungah caan karlak umhmun an khuar i, khuami hna zong a himnak hmun ah an zaam, tiah tualchung mi hna nih cun an chimchih. Yinmapin chungah SAC ralkap le mizapi hriamtlai PDF an i kah caah SAC ralkap pawl nih khuami cu an hrem, an tuk, an thah hna i an zaam dih, tiah kan theih.

Be First to Comment

Leave a Reply

Your email address will not be published.