SAC Ralkap Le KNDF Kar Kahdohnak A Fak
Demawhsu peng, nithum chung kahdohnak ah KNDF battalion 2 in minung 4 an nunnak a liam tiah theih a si. Demawhsu peng Okhuri(ဥခူရီ) khua ah rallam sialtu SAC ralkap hna le KNDF telh in tualchung mizapi vengtu ralkap phu kar April 11 ah kahdohnak a chuak, cu kahdohnak ahcun KNDF battalion 2 in minung 3 an nunnak a liam. April 13 kahdohnak ah Ngein Yan Aye a nunnak a liam than tiah KNDF nih an thanh.
SAC ralkap nih minung thazaang chap in rallam an sial caah mizapi vengtu ralkap phu hna nih hriamthil thazaang a rannak in kan herh ko tiah kahdohnak ah aa telmi mizapi ralkap nih an chim.Hriamthil thazaang bawmhchanh cio dingin mizapi sinah nawlnak zong an tuah.
”Hriamthil thazaang kan herhtuk ko, harsatnak hna cu kan tikhawh chung le kan dohkhawh chung in kan doh lai. Mizapi nih nan kan bawmhchanh cio lai ti kan zumhko” tiah KNDF ralkap chungtel pakhat nih a chim.
April 11 kahdohnak ah KNDF in nunnak a liammi hna cu Mawng Oo, Alexander le Kaung Myat hna an si. Ralkap pakhat nih a nunnak a liam hlan ah a tialta mi ca tlawmpal zong KNDF nih an cathanh ah an langhter chih. “Nungak na ngeihlo caah na thachia hlah, na lei ah a ttangmi mipi hna dawtnak a umko, Fighting” tiah a tial. TCP
Relchap; Ayarwady ramtthen Heintatah(ဟင်္သာတ) pengkomh Gyankhin (ကြံခင်း) peng palik sakhan in palik pakhat cu zurit bu in cycle a khalh ruang ah a cangsual (accident ) i a thi colh tiah tualchung mi nih an chim.
” Nizaan ah zuri palik pakhat cu cycle cangsual (accident )ruang ah a thicolh, cu a thimi palik cu Gyankhin(ကြံခင်း) palik sakhan in a si. A min le a reng cu ka thei lo, an mah riantuanti hawi palik sakhan ummi nih an rak zoh ko” tiah tualchung mi pakhat nih a chim.
Titoih puai nihnihnak April 14 ah Bago ramthen DaitOo (ဒိုက်ဦး) peng Waw(ဝေါ) palik sakhan in palik pawl cu zurit bu in anmah le anmah an i kah caah Duh- tatkyat Zin Myo Ko Ko a thi. Waw(ဝေါ)ah duh-tat-kyat a tuan lio mi Zin Myo Ko Ko cu NLD le PDF hna cungah a hlei in harnak a petu pakhat a si tiah Waw-PDF nih an thanh. TCP
