SAC Ralkap Le PDF Ralkap Kahdohnak Ah Kap Hnih Thi Le Hliamtuar An Tam Taktak Cang Khi Si Ko
NUG Number 1 Ralhmun Kahdohnak Ah SAC Ralkap 4,400 Leng An Thi, Meithal Zun 189 Chuh An Tong. NUG ruvennak zung No. 1 ralhmun a simi Sagaing, Mandalay, Magway ramṭhen le Shan ramkulh chaklei ah kahdohnak voi 2,500 hrawng a chuak, tiah runvennak zung nih cathanh an chuah.
Cuka hmunram kahdohnak cu 2021 October in 2022 December 15 tiang kahdohnak ah a thimi cazin langhtermi a si. Cu kahdohnak cu No. 1 ralhmun uktu PDF, Pah Khah Phah le EROs hna i bawm in an kahdohnak an tuahmi a si, tiah theih a si.
Voi 2,460 kahdohnak ah SAC ralkap 4,467 an thi i 4,618 hliamhma an pu. PDF le ṭangṭi phu lei in 361 nih an nunnak an pek ve i 476 hliamhma an pu, tiah an langhter.
Cu kahdohnak ah SAC ralkap meithal 189 chuh an ton pin ah zen-kuan tam tuk an chuh hna. Kahdohnak ah tlangcung hriamtlai he i bawm in an dohmi a si ko nain tlangcung hriamtlai an min cu an lannghter hna lo.
NUG runvennak zung nih cathanh an chuahmi ah kahdohnak voi 2,500 tluk ah voi 1,500 hi meithal in kahdohnak a si. SAC nih vanlawng in voi 100 kahdohnak an tuah i, an sakhan lak kahdohnak voi 156 kan tuah ve. Cu pinah bomb in voi 670 leng kan puahhnawh hna, tiah an langhter.
NUG nih 2023 chung ah kahdohnak fak deuh in kan tuah cang lai tiin thawng an thanh hnu ah voi voi khat ah timh ciammam tein kahdohnak hmun tampi ah an tuah i SAC ralkap an kah hna, tiah theih a si. Crd; The Chin Post
