Press "Enter" to skip to content

SAC Ralkap Le Pyusawthi 70 Hrawng Cu Mipi Hriamtlai Nih An Kah Hna, SAC Ralkap Minung 30 Hrawng An Thi

Magway ramṭhen, Pauk peng thlanglei Chetkan(ချက်ကန်) khua ah rallam a sialmi SAC ralkap le Pyusawthi 70 hrawng cu, Young Revolution Front(YRF) nih May 4 chun sml 1:30 hrawng ah an kah hna i, SAC ralkap 30 hrawng an thi kho, YRF in ralkap 2 an nunnak a liam ve, tiah theih a si.

“SAC ralkap pawl cu atu le atu bomb kan puahhnawh hna caah a thimi an tam hi a si. Zanlei sml 4:00 hrawng ah hnu kan kir, SAC ralkap thazaang 100 hrawng an chap ṭhan i, rallam an sial caah kan zenkuan nih a kan daih ve ti lo i hnu kan kir tak hna,” tiah YRF sinin theih a si. Cu hnuah SAC ralkap le Pyusawthi pawl nih Chetkan khua cu mei in an khangh, tiah theih a si. Credit: The Chin Post

Relchap; Mandalay ramṭhen Pyin Oo Lwin peng, Zipingyi(ဇီးပင်ကြီ) ah SAC ralkap hna nih zulh mi motor cu pah-kah-phah phu nih May 6, zinglei suimilam 5:30 hrawng ah an kahdoh hna caah SAC ralkap 4 an thi, tiah tualchung hriamtlai phu nih an thanh. Motor chung um mi minung 6 chung in minung 4 an thi, tiah tualchung hriamtlai phu in ṭuanvo ngeitu nih a chim.

Cu kahdohnak ah cun tualchung hriamtlai phu (အနက်ရောင်သေမင်း) lei hliamhma tuar an um lo, tiah theih a si. Tualchung hriamtlai (အနက်ရောင်သေမင်း) phu hna cu Mandalay ramṭhen pah-kah-phah phu an si i, humhimnak caah mizapi sin umkal ti lo in Mandalay cu kan kaltak lai, tiah May 5 ah cathanh an chuah.

Relchap; Kachin ramkhulh, Myintkyina khua ah SAC ralkap a dirpitu NDAK hruaitu Za Hkung Ṭinh Yan(ဇခုန်တိန့်ယိန်း) a inn cu Myintkyina PDF nih, 40 mm in ankah caah ralkap 2 an thi, tiah theih a si. “May 6 zaan sml 10:30 hrawng ah Maymyint sang um, NDAK hruaitu a inn ah ummi, SAC ralkap pawl cu Myintkyina PDF nih 40mm bomb in kan kah hna caah ralkap 2 an thi,” tiah Bo- Kyakyi(ဗိုလ်ကျားကြီး) nih a chim.

“Inn a hngakmi ralkap 2 cu an thi tiah kan theih. NDAK hruaitu Za Hkung Ṭinh Yan cu ralkap leiṭang Pyituhsit(ပြည်သူ့စစ်) hruaitu a si,” tiah Bo- Kyakyi nih cun a chim. Magway ramṭhen, Pauk peng CiahOo khua a khaangtu SAC ralkap cu May 5 ah PDF nih bomb an puahhnawh hna caah Lieutenant 1 le Pyusawthi 1 an thi, tiah PDF- Pauk Battalion 4 nih an thanh.

SAC ralkap pawl cu Didauhkwin(ဒီးဒုတ်ကွင်း) khua ah umhmun a khuarmi an si i, CiahOo khua mizapi inn 27 an hrawh dih hnu an kir lei ah, PDF-Pauk Battalion 4 nih, bomb in an puahhnawh hna caah Lieutenant 1 le Pyusawthi 1 an thih hi a si. TCP

Be First to Comment

Leave a Reply

Your email address will not be published.