SAC Ralkap Minung 16 Hna Cu An kahdoh Hna, Minung 4 An Thi
Thanyi Cawk Ah A Kal Mi SAC Ralkap Bomb Puah Hnawh An Tong I, 4 An Thi: Nihin March 22 zing Sml 11 hrawng ah Sagaing ramṭhen, Pale peng nichuah leinAyekung(အေးကုန်း) khua lam tonnak ah cycle 4 le motor pakhat in SAC ralkap 16 cu bomb puah hnawh an tong i SAC ralkap 4 an thi, tiah theih a si. Bomb puah hnawh a tong mi SAC ralkap lei zong nih an pawng kam hrawng cu meithal in an kah thlorh ve nain minung hliam mi an ngei lo, tiah theih a si. Credit; The Chin Post
Febuary 24 in Russia nih Ukraine a tuk thok in ngol loin bomb an thlaknak Ukraine ram Mariupol khuapi chung ah mizapi sing 4 leng cu eidin awk zong an ngei ti lo i electric hman ding zong an ngei ti lo i, cuticun khuapi chung ah chuak kho loin an i hreng.
Lungzawtnak a ngei mi cheukhat hna cu an thinphan tuk ah lungzawtnak in an nunnak liam mi zong an um. A Innpa a thi mi hna ruak a vui / phum tawntu Andre ti mi nih cun, “Atu tham cu a hramthok lawng si rih, hnu ah mithi ruak tamtuk phum/vui ding a um te lai,” tiah a chim.
Mariupol khuapi cu hnarcheu Russia nih an lak khawh cang i hnarcheu cu Ukraine kuttang ah a um rih caah khuapi chung ummi mizapi hna cu zei bantuk nih dah an kan tlak rih lai, tiah lungre thei in an um. OHCHR nih March 19 a thanh ning ah cun Ukraine civil mi 902 an nunnak liam cang i, 1459 hliam an tuar cang, tiah a thanh. Asinain Mariupol khuapi tel in khuapi kip ah nitin in Russia nih bomb a thlak caah a thi mi le hliamtuar mi dihlak cu dihthlir tein hngalh khawh si lo.
Relchap; Myanmar ramlei hoih in a hrang mi thlichia nih ruah faak pi a ken ruangah Irrawady ramṭhen, Laputta pengkulh chung khuate hna ah ti a lian, tiah tualchung mi hna nih an chim. Laputta peng, Bituat khua mi pakhat nihcun, “Thlichia ruangah nihin march 22 suimilam 11 in 12 tiang hrawng ruah faak ngai in a sur i, thli zong a hrang pah, atu cu ruah cu a dai cang i khua a thiang ko cang nain ti tu cu a ṭhang peng,” tiah a chim.
Ti a ṭhan hi tuzing sml 8:30 hrawng in aa thok i ruah zong a sur pah caah lam le hlei pawl zong a phum hna, tiah theih a si. Tutan thlichia hrang ding mi hi Nihin March 22 chun ah Irrawady ramṭhen Hangyi pawng in a kal lai, tiah khuacaan tuakthiam hna nih an chim. Thlichia ruangah Myanmar ram hmunkip ah ruah a sur kho i thli a faak kho, thli hi suimilam pakhat ah meng 45 tluk faak in a hrang kho fawn, tiah an thanh.
Thlichia ruang ah hin nizaan thok khan Yangon tel in Myanmar ramchung hmundang hna ah ruah a tuk, thli a faak i, tuzing zong ah Irrawady ramṭhen Hangyi tikulh tel in khua cheukhat ah ruah a tampi a sur i, ti a lian. Thlichia nih hin March 22 chun in Irrawady ramṭhen Hangyi kam a van pal pah cang i tuhnu suimilam 24 chung ah Pathein khuapi pawng chaklei ah ai ṭhial lai i, Rakhine Yoma tlangthluan lei ah a kal lai, tiah khuacaan zohtu hna nih an chim. TCP
