SAC Ralkap Nih Bamar People’s Liberation Army Hruaitu Le Chungtel Cheukhat An Tlaih Hna
Bamar People’s Liberation Army(BPLA) i policy team leader Su Chit(စုချစ်) le chungtel cheukhat cu SAC ralkap nih March 9 ah khan an rak tlaih hna, tiah BPLA nih thawng an thanh. Ralkap Su Chit hi Human Right, Peace, le Development lei ah hliphlau ngai in rianṭuantu, Myanmar ah hram bunh mi The Seagull phu ah nawlngeitu bik zong an rak si bal.
Su Chit tel in Han Phyo Aung(ဟန်ဖြိုးအောင်), Tein Min San(သိန်းမင်းဆန်း) le volunteer siibawi nu pakhat cu KNLA bridage 1 hmunhma Tatkegin(သက်ကယ်ကျင်း) khua ah tlaih an tong, tiah BPLA nih cun an thanh. BPLA ralkap pawl an tlaih hnanak hi zarhkhat leng a si cang i, atu tiang an thawngpang theih a si lo. BPLA hi SAC nih uknak laak hnu March, 2021 ah dirh a si i, Myanram ram i kawl miphun aiawh in dohthlennak a tuahtu hriamtlai phu pakhat an si.
relchap..SAC ralkap kuttang BGF Battalion 1016 in ralkap pakhat Saw Maw War cu March 17 ah KNU Brigade 5, Battalion 102, Tatkhuai 3 sin ah a hriamnam tling he CDM a tuah, tiah KNU Brigade 5 Mutraw thawngthanhnak nih an thanh.
Far Ann( ဖားအံ) khua, Saw Maw War nih, “SAC ralkap bawi nawlpeknak bantuk in Kayin mipi cung ah kahdohnak tuah le sualnak ngei lo mipi thah hna cu tuah ka duh ti lo” tiah a ti i, a hriamnam tling he KNU sin ah a lut, tiah Mutraw thawngzamhnak a thanh.
BGF Brigade 1016 cu Hlaing Bwe ( လှိုင်းဘွဲ့) peng, Daw Laan khua um mi Battalion pakhat a si. Ralkap Saw Maw War cu M-16 pakhat, Kuan bawm 3, kuan 300 aa chuahpi, tiah theih a si.
