Press "Enter" to skip to content

SAC Ralkap Nih Dagon University Sianghngakchia Minung (7) Bak Insein Thongah Thih Dan An Pek Hna Ee

Hramhram Uknak Chut-tu Ralhrang Dohnak Ah A Tekcawlmi Hruaitu Dagon University Siangngakchia Pa 7 Thihdan Pekding In Biachahnak An Tuah Piak Hna/ Dipa [December] 01, 2022_CCN

Ralhrang dohnak ah a tekcawlmi hruaitu Dagon University siangngakchia minung 7 cu Sikpar [November] 30, Insein thong biaceihnak zung nih thihdan pekding in biakhiahnak an tuah piak hna tiah Dagon University siangngakchia sin in theih a si.

A luancia April thla ah an rak tlaihmi hna Dagon University siangngakchia minung 7 hna cu Facist dohtu ah nan i tel ti le, April 18 lio ah ကမ္ဘာ့ရတနာ bank manager Saw Moe Win thahnak ah nan i tel tiah pohmah 302 in sual an puh hna caah thihdan pekding in bia an khiah piak hna hi a si tiah theih a si.

Cu bantuk ṭhiamṭhiam in Sikpar 30 ah May 24 lio ah a cangmi New Dagon No. 45 khuabawi Khine Maung Tan thahnak kong ah nan i tel tiin mino 4 zong thihdan pekding biakhiahnak an tuah piak ve hna tiah theih a si. Ref: Khit Thit Media

Relchap; Na minung hawi cu mu! Nangmah bang nihin atu ah a inn a lo ah an thu sawh lo! Nu dawtnak, fa dawtnak, pa dawtnak, vialte tinco ve don ve kha an duh ko nan ram dirhmun an i fian ca ah thisen le nunnak thap in rian an tuan.

Thap mi um lo riantuannak cu hmual a nei lo, hi dothlennak ah nunnak hi a herh ahcun kan pek lai timi lungput le thap ngam ve lo ahcun i teltum khawh ve, raltuk ve khawh zawng a si fawn lo.

Nu nih fa le ca, chungkhar ca ah zingzaan tirawl chuanmi, Sung Hno nu chuan rawl kan ti pengmi i hrawm duhtuk mi lawngte an si ko nan rezap um lo nunnak thap in inn chungkhar, Lungthu Tappi, nuchuan rawl kha ram ca ah tiin pumpeknak he an chuah tak.

Zeiruangah na chuah tak khawh ve lo! Zeiruahnak he dah ram hi na dawt! Na mipum ral na tuk khawh lo zawngah tuahsernak thawhnak, forh fialnak tal in raltu ve ding in itim cang…

Pasal, Nusal ai tive mi ziah daitein kan um ko rih! Mizeipoh nih kan riancio ah kan i chiah a hau, midang tuanmi theipar lawng bawhtu si hlah!

Mi lo zil le mai an mehhaang i rinhtu si hlah, mah hrimhrim hi tuantu ngeitu si khawhnak kha i zuam a biapituk hih.
Ram mi si lawng i tim fawn hlah, ram ngeitu si zawng i tim law a ngeitu na si tik ahcun thadam te le zalawng tein na ram ah na cawl cang kho te lai. Crd; Salai Dk

Russia a Chuah hnu in Kherson ai Sersiam Than
===================================

Kherson khuapi a luatnak hi zarh khat a si cang ko nain, thlapa thla 9 chung Russia kut an tuarmi hi khuami hna nih an buaipi peng ko rih. Mitlau an tam, hmunkip ah bomb tarhmi an um rih, dawr tampi ai khar ko rih, mei le ti duhning in hman awk a um rih lo. Dnieper River ralchan veve in Ukraine le Russia heh tiah chun zan in an i kahtonh peng rih caah ah bomb thawngpang a leng peng ko rih.

Mahtluk harnak tampi an ton ko zongah cun khuami hna cu an thaw a chuak, an i lawm, a thatnak lei kapin khua an ruat. “Thawchuah a fawideuh suaumau. A tu ah cun zeizong te ai thleng dih cang e. Kan Ukraine ralkap khua chung an hung luh lio cu kan i lawmhtuk ah a chim zia kan thiam lo” tiin lomhnak in a khatmi sidawr zuartu Olena Smoliana nih a chim.

Ral thawh hlan ah khan Kherson khuapi minung hi 300,000 an si i, a tu hi 80,000 hrawng lawng an tang. Monday ah khan Zelensky nih a vung veh hna i Russia an thawl khawhmi kongah a lunglomhnak a langhter. ‘Hihi ral a donghnak a hramthoktu a si’ tiin a chim.
Khuami hna cu leng chuah an ttih ti lo, Russia nih an kan tlaih lai i thong ah an kan thlak lai, an kan hrem lai, ti zong an phang ti lo. Khuapi laicer ah an i pum hna, an zal le angkilum ah an Flag rong an suai cio hna. An phone an tun hna, ti an than, an innpa le sahlawh he bia an i ruah kho than cang hna.

“Russia kut kan lalh khawh a si ah cun, tirawl, mei kong i chambau in kan ummi tham hi cu fawitein kan lalh khawh ko lai’ tiin Russia nih an khua an lak hnu ah inn a vapa he inn lawngah ai erh pengmi Yulia Nenadyschuk, 53, nih a chim. A tu ah cun an nuva tein ni chiarte khuachungah a ra cang.

“Chambauhnak nganbik cu na sining tein si kho lo dingin zalonnak an in lakpiak mi hi a si. Cu dirhmun cu kiam chung khumh he ai khat,” tiin Yulia nih a chim.

“Zeikong hmanh thang in na chim ngam lo, Ukraine holh zong na hmang ngam lo. An kan ngiatthlai peng, a kehorh hmanh i mer a ngah lo” tiin Oleksandr Nenadyschuk, 57, nih a chim.

A kan ramhmi hi ‘a thawng ai thei lo mi thil tthinung’ (silent terror) tiin kan auh. Kadang Ukraine khua pawl an lak bantuk he kan sining ai lo ve lo, tiin Kherson khuami hna nih an chim.

Tutan ral ai thawh ka hrawngin khan Crimea lei in Russia pawl an hung lut i, Kherson cu an lak colh. Kherson i mipi tam u cu Russia holh in kan i chawn ngawt hna. Ral ai thawh ka hrawngah khan cun Russia a tanhmi innpa pawl hi an innpa hna nih an ruahthiam ko hna. Asinain thla 9 chung kan luh hnu cun an ngaithiam kho cawk ti hna lo. Russia holh hman hmanh ka ning a zak cang. Russia pawl nih kan taksa le thinlung tiangin an kan hrem, tiin sidawr ngeitu Smoliana nih a chim.

Mi tampi nih khua an chuah tak, a cheu cu a lolh in an lo dup. Khrystyna Yuldasheva, 18, hi Russia police nih thong bantuk in an hmannak dawr pakhat ah rian a tuanmi a si i, a tu hi cuka inn ah cun Russia nih ral phung an buar le buar lo Ukraine cozah nih hlathlainak a tuah lio pi a si.

“Mah ka hin ahohmanh an um ti lo,’ tiin a fapa a hung kawlmi hringtunu pakhat cu a Khrystyna nih a chim. ‘A dang zong chuah an i tim ve nain, an chuak kho lo. Voithum tiang chuah kai tim ve, asinain khuapi chuahnak lam a si mi paoh an phih dih’ tiin Teitiana, 37, nih a chim.

Nov. 11 i Russia nih Kherson khuapi an chuah tak ah khan lawng kawro in an kaltak. Mei, ti, phone le linka (transportation) pakhat hmanh an um ti lo. Dawr hme tete ah cun Russia ser thilri pawl an um ko rih. ‘Ukraine le Russia hi ram khat kan si. Ukraine nih Russia passport nan i ngeih khawh’ timi catar lawng te khuapi chungah a khat. Mah cu ca an hmuh paoh ah a cheukhat khua mi hna nih chiat an serh.

Dawr, rawldawr, hotels tampi cu an kar ko rih. Mi tampi rian lo an si. Asinain Ukraine supermarkets phu pawl nih truck in heh tiah mipi cu tirawl an ngalh hna. Internet zong an bunhpiak colh hna. Russia pawl an kir le cangka mipi an lawmtuk ko nain, Kherson ah zei hmanh duhning in a kal kho rih ruam lo.

Kherson ah a zammi khuami hna kirter than ding le khua remhsiamnak kalpi dingah cun Russia nih an tunhmi bomb vialte phelh ta dih an hau hmasa lai, tiin Ministry of Internal Affairs nih a chim.

“Khuasaknak umter than dingah cun bomb phelhpiak rian hi kalpi a hau hmasa’ tiin MIA Mary Akopian nih a chim. Kherson hi a dang khua nakin Russia kut a um chung a sau deuh caah, a chung i bomb tarhmi zong hi a tamdeuh ving. Cucaah khuachung le a kiangkap i tarhmi bomb vialte phelhnak dingah cun kum tamial a rau rih ding a si. Kherson i tarhmi bomb phelh rian a tlaimi chungin minung 25 bak an thi cang. Khua lei a hung kirhnawhmi khuami pahra lenglo bomb an i lamh i an thi.

Khua an chuahtak hlan ah Russia ralkap nih dawr an bauh, kan museums (piahteih) thilri hmanh an fir ta. Kherson pengkulh i kan chiahmi pupa rothil 15,000 lenglo hi an fir i Crimea lei ah an kalpi, tiin Ukraine cozah nih a chim. “Kan piahteih ah zeihmanh a tang ti lo. Russia pawl hi lainawng, mifir, bomb tarh hmang an si’ tiin Zelensky office ah senior official a si mi Kyrylo Tymoshenko nih a chim.

Kherson khuapi cu an chuahtak ko nain, a pengkulh chung i 70% tluk hi Russia kut ah a tang peng ko rih. Khua chungah bomb thawng an theih peng ko rih. Tarhmi bomb an phelhmi maw a si, asiloah kaphnih an i kah tonhmi bomb thawng dah a si, ti an fiang lo.
An pawng te ah kahdohnak a linsa ngai ko nain, cun vanlawng in kah nan si kho men rih, tiin biaka a leng ko nain, Kherson mipi pawl cu an hna a ngam ngai cang i, tam u cu khuapi chung lampi ah an chuak cang hna.

Khat le khat an i suahlam, Ukraine ralkap pawl sinah lomhnak bia an chim hna. Nenadyschuks nuva hna zong an lung a thawng ko rih. ‘Kan i chang tualmal ko rih. Teinak lawng kan hngak ko. Kan vuivai lai lo. Ukraine pumpi hi kanmah bantuk tein an lung a thawng dih’ tiin an chim. By- Chelsea Bawi

Be First to Comment

Leave a Reply

Your email address will not be published. Required fields are marked *