SAC Ralkap Nih Yinmapin Peng Ah PDF Sakhan Pakhat An Lak, Sagaing ramțhen, Yinmapin peng hrambunh Chindwin Revolutionary Fighter le Mahura Daungmin PDF ralkap hna umnak Sakhan pakhat cu SAC ralkap nih an luhhnawh hna i ting 100mmk man tluk a simi hriamnam an chuh hna pin ah an riahbuk zong an khangh piak dih hna tiah theih a si.
”January 25 ah khan an kan luhhnawh i kan riahbuk an kan khangh piak, Zaan ah Myayeih phungki biakinn ah kan riak i, a thaizing zaanlei in Myayeih khua zong an khangh” tiah Mahura Daungmin PDF țuanvo ngeitu nih a chim.
SAC ralkap hriamngan nih PDF ralkap 5 a hliamh hna pin ah Myayeih khua zong January 26/27 tiin nihnih peh in an khangh caah Phungki biakinn tel in Inn 63 a ciam, SAC ralkap nih thazaang 100 hrawng in an nam hna tiah theih asi. The Chin Post
KIA le Shanni Nationalities Army(SNA) Kar Kahdohnak A Chuak, Kachin ramkulh le Sagaing ramthen ramri , Hpakant peng Seyin khua pawng ah nizaan january 26 zinglei slm 4:00 hrawng ah Kachin Independence Army( KIA) nih Sagaing ramthen lei ral ah a um mi Shanni Nationalities Army(SNA) check- gate an kah i an khangh tiah theih asi.
Seyin khuami pakhat nihcun ”zinglei sml 4:00 hrawng ah kah an i thok hi a si i,suimilam pakhat chung hrawng an i kah hnu ah KIA nih SNA check gate cu an khangh, an i kahnak check gate hi kan khua he ai naih te, tiva lawng nih an kan dan, Check gate hi Sagaing ramțhen chung ah a um mi asi” tiah a chim.
Kahdohnak ah kaphnih thi le hliam kong hngalh a si rih lo i Kahdohnak pehzulh in a chuak khomi a si caah khuami cheukhat hna cu khualeng ah ai dormi zong an um tiah a chim chap.
Nikum, 2022 july le August thla lio zong ah Seyin khua ah KIA,PDF tangți le SNA,SAC țangți kar kahdohnak faktuk a rak chuak i khuachung ah vanlawng in bomb an rak thlak caah khuami thi le hliamtuar an rak um i khuapi ning in ral an rak hrial. the Chin Post
SAC Union Election Commission Nih Ramkhel Party Upadi Thar Chuah, Min Aung Hlaing nih 2023 ah rampi thimnak ka tuah lai tiah a chim hnu in SAC kuttang Union Election Commission(UEC) nih Ramkhel Party upadi thar an ser tiah theih a si.
Upadi thar an sermi ah, Party thar dirh a duhmi hna nih Myanmar Economic Bank ah kyats sing 1,000 an ap lai i, Party an dirh ni in thla thum chungah Party chungtel sing 1 an ngeih a hau, tiah an langhter.
SAC nih a cohlan lomi bu le thong a tlami hna nih Party an dirh kho lo. Party a ngei cangmi hna zong nih upadi thar kan ser ni thawk in thlahnih chungah register an tuah lai i, register a tuah lomi Party paoh hrawh an si lai, tiah UEC nih cun an langhter.
Aung San Suh Kyi nih a hruaimi NDL Party zong hrawh ding dirhmun a phan. A ruang cu NLD luttlai hna thong an tlak caah a si. SAC nih an rak tlaihmi NLD lutlai cheukhat cu an thlah ṭhan hna nain Aung San Suh Kyi nih cun NLD lutlai hna he i ton hnuah kan Party dirhmun kan chim te lai, tiah a chim ve.
The Chin Post
Be First to Comment