SAC Ralkap Nih Raltuknak Vanlawng In A Kah Hna Caah Minung (170) Leng An Thi Cang E
SAC Ralkap Nih Pazikyi Khua Vanlawng In A Kah Ruang Ah Nunnak A Liam Mi Cu Minung 171 Tiang An Phan Cang!
Sagaing ramṭhen, Kanbalu peng Pazikyi khua cu SAC ralkap nih a luancia April 11 ahkhan vanlawng in a kah ruangah tualchung mi 100 leng an Nunnak a liam i, nihin April 14 zinglei tiang ah nunnak a liam mi 171 tiang an phan cang, tiah cuka hmun ruak fimhlawmtu hna nih an chim.
Sualnak ngei lo tualchung mipi nunnak a liam mi 171 chung ah pa 109, nu 24 le kum 18 tang ngakchia 38 an si tiah bawmchantu hna sin in theih a si.
“Nihin April 14, zinglei tiang ah nunnak a liam mi 171 tiang an phan, atu tiang ah cun nunnak a liam mi cazin aa chapmi a um rih lo, hi thil a cannak hmunhma tam deuh cu thianhhlimh a si cang. Thingkung, ruakung cung le burbuk deuh ah taksa a choiper mi zong fimhlawm in khangh an si cang.
Khuachung mipi a him mi hna zong khuachung ah an um ngam ti lo caah a himnak hmun ah an i dor hna. Cu zong cu mi bu in an um ngam lo caah minung pahnih thum tiin an i ṭhen hna. Thawngpang thang deuh theih zong an ṭih i, cycle seh thawng an theih hmanh ah vanlawng in kah an kan timh tiah an lau,” tiah bawmchantu phu chungtel pakhat nih a chim. The Chin Post
Karen, ramkulh, Myawaddy peng chungah a ummi SAC ralkap kuttang BGF sakhan pakhat cu April 12 le 13 ah kan va kah i kan laak khawh, tiah Cobra Column nih cathanh an chuah.
April 12 ah BGF Theintankone sakhan cu Cobra Column nih an va lak pinah BGF 10 an thi i, hriamnam tam ngai zong an lak khawh, tiah theih a si.
SAC kuttang BGF Kyaukmaingkone sakhan zong April 13 ah sniper in kan kah i BGF ralkap 3 an thih caah chun nitlak hriamngan an thlah, tiah Cobra nih cun an langhter.
April 10 in 13 tiang kahdohnak ah SAC kuttang ralkap 13 an thi i, hriamnam le zen-kuan zeimawzat kan laak. Kanmah lei in ralkap 4 nih an nunnak an pek ve, tiah an langhter.
