Press "Enter" to skip to content

SAC Ralkap Nih Rihkhuadar Ah CNDF Ralkap 4 An Tleih Hna

Council ralhrang nih Rih ramri gate a hngak mi CNDF ralkap 4 an tlaih hna, motorcycle 6 an khanghpiak hna. 2022 March 26 zinglei 5:30 tluk ah Council ralhrang nih India-Myanmar ramri Rih hlei gate a hngak mi CNDF ralkap pawl an va kah hna i CNDF ralkap minung 4 an nun buin an tlaih hna lawng si loin an motorcycle 6 an khanghpiak hna tiah theih a si.

Video hi zohhmanh an khanghmi a si!

Ralhraang nih CNDF minung pali an tlaih mi hna kong he pehtlai in, “Anmah ralhrang lei nih kan umnak hi an thei lo. Dalan ruang ah a si bik ko. Dalan nih an riahnak inn an chimh hna i atu bantuk in an tlaih mi hna hi a si,” tiah CNDF chungtel cheukhat hna nih an Facebook cahmai ah an langhter. India-Myanmar ramri gate a si mi Rih Hlei cung ah CNDF nih flag an thlai mi zong Council ralhraang pawl nih an phoih hna tiah kan theih. Video: Council Ralhraang pawl nih CNDF ralkap pawl motorcycle an khangh lio kha India ram lei in an zoh lio a si. Credit; The Hakha Post

Relchap; SAC mawtaw 80 leng doh dingah a hlannak in timhtuahnak ṭha deuh kan ngei: CDF-Mindat. The Chinland Post | 2022 March 26 – Magway ramṭhen Kyaukhtoo in Chin ramkulh, Mindat khua ah a raa mi SAC ralkap mawtaw 80 leng kahdoh dingah a hlannak in timhtuahnak ṭha deuh kan ngei tiah CDF-Mindat in biachimnak nawl a ngeitu Salai Ha Um nih a chim.

Tank 2 aa telmi ralkap mawtaw thluan hi March 23 ah Mindat khua ah an phan tiah theih a si. SAC ralkap mawṭaw thluan cu March 25 ah Mindat in Matupi lei ah eidin chan dingin an len tiah theih a si. Mawṭaw pawl hi eidin khat tein an phor I frame pawl zong a hlannak in ṭha deuh in an tuah i ruah khamnak zong him tein an khuh tiah a chim.

“Tutan ah a hleikhunmi cu mawṭaw cungah hriamngan pawl timhcia tein an chiah hna. A hlannak in an i timhtuah dan a ṭha deuh. A hlan cu tank lawng a si. Atu cu tank lengah hriamngan pawl zong an i tel chih” tiah Salai Ha Um nih cun a chim. CDF-Mindat facebook cahmai ah CDF-Mindat headquarters strategist nih a ruahdamhmi a tanglei bantuk in an langhter.

“Kan mah lei ah a raami tank 2 le mawṭaw 80 leng hi a luancia kahdohnak voihnih lioah kanmah lei a thimi um lo tein fak tak in kan kah hna i a thimi cazin zong an theih ko lai. Atu cu ṭha tein timhtuahnak an ngeih caah a har deuh ko lai” tiah Strategist nih a chim. SAC ralkap pawl nih CDF-Mindat hi an kan theihfiang ngai cang i kan meithal kuan zong a tlawm ngai tiah a langhter.

“Mipi hna nih CDF-Mindat hi nan lung kan tling tuk lai lo. Himnak a lakpiaktu ralkap 400-700 lengah lamhlaipi a kap khomi mawṭaw le hriamngan a ngeimi ralkap he i tuk hi a fawi bak lo. An mawṭaw pawl le an tank pawl cu hrawhpiak khawh an si. Lampi i an tap tikah a pawngkam khua hna harnak an pekding kha kan thin a phang. Atutan mawṭaw cungah an phorhmi hi hriamnam hna an si ko lai” tiah CDF-Mindat Strategist nih a chim.

An hriamnam le kuan pawl hi AA he raltuknak lei entainak a um caah Matupi battalion thazang chap ding in an phorhmi a si lai tiah a chim. “A ruah hlan ah kahdohnak a chuak ko lai” tiah strategist nih a Facebook cahmai ah a tar. SAC ralkap hi a hlan zongah Mindat in Matupi ah mawṭaw in thazang an chap i CDF-Mindat nih voi tam ngai an rak kah cang hna.

Be First to Comment

Leave a Reply

Your email address will not be published.