SAC Ralkap Nih Sualnak Ngeilo Mipi Chungin Minung 10 Hrawng Tleihkhih An Tonnak Thawngtheih A Si
Pago ramṭhen, Naṭalin PDF Nuva hna cu Zikung palek camp ah hriamnam an chiah i, an i ap hnu in Naṭalin le Zikung peng in phungki pakhat tel in mizapi 10 hrawng tlaih an tong, tiah theih a si. Hriamnam chiah in aa ap mi nuva hna cu Zikung khuapi chung ah khuasa mi Ko Myo Gyi le a nupi an si i, March 12 ah khan an hriamnam chiah in an i ap. An i ap thaizing ah civil mi 10 hrawng cu tlaih an tong colh ve.
Bago Region PDF lutlai pakhat nih, “Hi thawngpang hi a dik mi a si i, Ko Myo Gyi hi training zong a kai mi a si. A chungkhar he PDF camp ah an um i chumhchuan lei ṭuanvo a latu a si, rallei kap belte ṭuanvo an pelo i, hriamnam tu hi cu anmah tein an ngeih mi hna a si kho men, a nupi he palek sakhan i an vai i ap hi an chungkhar boruak ruang ah a si lai ka zumh,” tiah a chim. Zikung Palek sakhan ah aa ap mi Ko Myo Gyi cu Naṭalin PDF le Zikung PDF hna he pehtlaihnak ngei mi a si caah PDF ralkap hna cu hmundang ah an i thup rih hna, tiah theih a si.
Relchap; Rohingya miphun cung ah Myanmar ralkap nih miphun cihmih thahnawnnak a tuah, tiah US Cozah nih a thanhmi cu SAC nih a dohdal i March 22 ah SAC Foreign Ministry nih dohdalnak cathanh a chuah colh ve. US Foreign Minister Antonio Blinken nih cun March 21 i Washington DC ah tuahmi Rohingya pawl thahnawn a tonnak kong ceihkhannak ah ‘Myanmar ralkap nih Rohingya miphun cung ah miphun cihmih thahnawnnak a tuah ko,’ tiah a thanh.
2017 kum ah Rakhine ramkulh chaklei ah Myanmar ralkap hna nih Rohingya miphun hna cung ah miphun cihmih thahnawnnak le Nuhrin covo buarnak (Crimes against Humanity) a tuah, tiah Antonio Blinken nih cun a thanh i, hihi a dikmi le kap ngei lo thawngpang le Human Rights pawl kan i chirhchan pinah US Foreign Ministry zong nih ṭha tein kan hlathlai hnu ah bia kan khiah mi si, tiah a chim chih.
SAC Foreign Ministry nih cun, “Myanmar ram cu Miphun cihmih thahnawnak ‘Genocide’ a dohtu UN ah member kan si bang in hi bantuk thil hi kan tuah lo,” tiah an cathanh ah an ṭial. Hi US nih Myanmar ralkap kong ah a thanhmi hi Bangladesh ram Home Affairs Minister Asaduzzaman Khan nih a dirpi i Bangladesh ram um mi Rohingya kong ah a cawlcangmi mino hna zong nih an cohlan i US nih Myanmar cung ah dantatnak faak deuh pek ding zong in a nawl. tcp
