SAC Ralkap Nih Tualchung Mi Nu 3 An Tlaihhrem Hna Hnu Ah An Thah Beh Hna Ee
Sagaing Ramṭhen, Tadai Khuami 17 SAC Ralkap Nih An Thah Hna, Cu Chungah Nu 3 Tlaihhrem In Thah An Tong, Sagaing ramṭhen, Tadai khuami nu 3 cu SAC ralkap nih an tlaihhrem hna hnu ah an thah hna, tuksaphur le zohchia taktak in an tuahto hna tiah tualchung hriamtlai phu le tualchung mi hna nih an chim.
March ni 1, zan ah rallam sialtu SAC ralkap hna cu Tadai khuachung ah an lut, March ni 2 zinglei ah rallam sial ding in an chuah ah tualchung mi nu 3 le pa 14 an dihlak ah minung 17 cu ralphaw caah an hruai hna i lampi ah an dihlak in thah an tong, an ruak zong lamkam ah an hlonh hna.
Ralphaw caah tlaih a tongmi nu hna cu an tlaihhrem hna hnu ah zohchia tuk in an tuah hna. Thah a tongmi hna an ruak laak khawh lo ding in ruak tang ah bomb an hmanh hnawh hna tiah theih a si.
“Nihin ah pa ruak 2 kan hmuh chap caah nunnak liammi hi an dihlak ah minung 17 an si, Tadai khua lmi pa 14 le nu 3 an si. Nu hna cu an sualpi hna hnu ah an thah hna, thah a tongmi nu hna chung in pakhat cu a chiaṭha zohchia tuk in an tuahto” tiah tualchung mi pakhat nih a chim.
SAC ralkap kut in nunnak liammi hna hi kum 17 in kum 60 kar Tadai khuami an si. Cu chung ah pa 3 hi min theih rih lomi an si.
SAC nih Sagaing, Wetlet, Yinmabin le Shwebo ah rallam hmun tampi in an sial i, tualchung mi hna an umnak inn khanghpiak an ton leng ah tlaih le thah an tong, fak tuk in cawlcanghnak an tuah caah tualchung mi thonghra leng ralhrial dirhmun an phan tiah theih a si. Khit Thit Media
Relchap; Wetlet Peng Kyikan Khua SAC Ralkap Nih Ni Hnih Chung An Khangh, Tualchung Mi 7 Hrawng Thah An Tong. Sagaing ramṭhen, Wetlet peng Kyikan khua cu SAC ralkap nih an khangh pin ah tualchung mi zong meikhangh in thah an tong tiah Wetlet Informational Network in ṭuanvo ngeitu pakhat nih a chim.
March ni 2, zinglei suimilam 10:00AM hrawng in SAC ralkap nih Wetlet khua cu an luhhnawh hnu ah tualchung mi hna umnak inn cu an khanghpiak hna. Nihin March ni 3,
zinglei suimilam 7:00AM hrawng ah SAC ralkap nih khuachung inn an khangh ṭhan, tualchung mipi cheukhat cu mei khangh in thah an tong, minung zeizah nunnak a liam fiang tein theih asi rih lo.
“SAC ralkap nih ni hnih chung pehtlai in khuachung an khangh caah sunghmi cu a tam ngai, inn zeizah a ciamh cazin laak lio a si caah fehter a si rih lo” tiah Wetlet Informational Network in ṭuanvo ngeitu pakhat nih a chim.
Wetlet tualchung mipi cheukhat nih an chimning ah cun thah a tongmi hi a tlawm bik minung 7 an si lai tiah an chim. Khit Thit Media
